តាមអនុក្រឹត្យដែលក្រសួងយុត្តិធម៌ និងក្រសួងសុខាភិបាលទើបកែសម្រួលទៅតាមការបញ្ជារបសសម្តេចនាយករដ្ឋមន្ត្រីហ៊ុន សែន កាលពីថ្ងៃចន្ទអ្នកគេចវេះមិនធ្វើចត្តាឡីស័កនឹងត្រូវទទួលពិន័យពី១លានដល់៥លានរៀលខណៈអ្នកញុះញង់ឲ្យគេចវេះត្រូវផាកពិន័យពី១០លានដល់៥០លានរៀល។
ការបង្កើនការផាកពិន័យលើអ្នកគេចវេះពីវិធានសុខាភិបាលនេះ គឺធ្វើឡើងស្របពេលដែលពលករខ្មែរនៅតែបន្តវិលមកពីប្រទេសថៃវិញជាបន្តបន្ទាប់ ហើយមានអ្នកខ្លះនៅតែព្យាយាមគេចវេះពីការធ្វើចត្តាឡីស័ក។
អ្នកដំណើរឬការីនៃយានដឹកជញ្ជូន ដែលគេចមិនឱ្យមន្ត្រីចត្តាឡីស័កធ្វើការត្រួតពិនិត្យ ឬមិនសហការជាមួយនឹងមន្ត្រីចត្តាឡីស័កក្នុងការអនុវត្តវិធានការសុខាភិបាលដែលមានកំណត់ក្នុងអនុក្រឹត្យដែលទើបកែសម្រួលនេះ ត្រូវទទួលពិន័យអន្តរការណ៍ជាប្រាក់ពី ១លានរៀល ទៅ ៥លានរៀល និងតម្រូវឱ្យអនុវត្តវិធានការសុខាភិបាល។
ជាមួយគ្នានោះអ្នកដែលរត់គេចចេញពីកន្លែងធ្វើចត្តាឡីស័កក៏ត្រូវបានពិន័យដូចគ្នានេះដែរ។ដោយឡែក ជនណាដែលផ្តើមគំនិត ដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយ ចេតនាដល់អ្នកដំណើរឬការីនៃយានដឹកជញ្ជូន ឱ្យគេចចេញពីការត្រួតពិនិត្យ ឬគេចវេះពីការអនុវត្ត វិធានការចត្តាឡីស័ក ត្រូវទទួលពិន័យអន្តរការណ៍ជាប្រាក់ពី ១០លានរៀល ទៅ៥០លានរៀល។
ការពិន័យដូចគ្នានេះនឹងត្រូវធ្វើឡើងផងដែរ ចំពោះគ្រឹះស្ថានសុខាភិបាលឯកជនទាំងអស់ ដែលមិនបានជូនដំណឹងជាបន្ទាន់ទៅក្រសួងសុខាភិបាល ករណីមានតម្រុយបញ្ជាក់ថាអ្នកជំងឺបានគេចវេះពីការធ្វើចត្តាឡីស័ក។
នេះយោងតាមអនុក្រឹត្យដែលចុះហត្ថលេខាដោយ លោក ហ៊ុន សែន នៅថ្ងៃទីថ្ងៃទី១៨កុម្ភៈ ២០២១ ស្តីពីការកែសម្រួលមាត្រា៨ នៃអនុក្រឹត្យលេខ១២៩ ស្តីពីវិធានការសុខាភិបាល ដើម្បីទប់ស្កាត់ និងឆ្លើយតបការឆ្លងរាលដាល នៃជំងឺនៅតាមច្រកចេញចូល។ការពិន័យអន្តរការណ៍គឺជាសមត្ថកិច្ចរបស់ក្រសួងសុខាភិបាល។
ក្នុងករណីជនល្មើសមិនព្រមបង់ប្រាក់ពិន័យក្នុងរយៈពេល៣០ថ្ងៃគិតចាប់ពីថ្ងៃទទួលបានសេចក្ដីសម្រេចស្ដីពីការពិន័យនេះ មន្ត្រីក្រសួងសុខាភិបាលដែលមាននីតិសម្បទាជានគរបាលយុត្តិធម៌ ត្រូវកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីជាធរមាន។លើសពីការផាកពិន័យនេះ ប្រសិនបើជនណាក្លែងបន្លំឯកសារពាក់ព័ន្ធសុខភាពក្នុងគោលបំណងគេចវេះពីការអនុវត្តវិធានការចត្តាឡីស័ក ក៏ត្រូវប្រឈមនឹងជាប់ទោសព្រហ្មទណ្ឌផ្សេងទៀតដែរ។ នេះបើតាមអនុក្រឹត្យ៕
