ក្រសួងធនធានទឹក ប្រាប់ពលរដ្ឋ ជាពិសេសអ្នករស់នៅតំបន់មាត់សមុទ្រ ឱ្យបង្កើនការប្រុងប្រយ័ត្នខ្ពស់ចំពោះបាតុភូតផ្គររន្ទះ ខ្យល់កន្ត្រាក់ខ្លាំង និងរលកសមុទ្រខ្ពស់ ចាប់ពីថ្ងៃស្អែកដល់ចុងខែឧសភានេះ។
ក្នុងសេចក្តីជូនដំណឹងរបស់ក្រសួងធនធានទឹក និងឧតុនិយម បានឱ្យដឹងនៅថ្ងៃទី១៨ ខែឧសភានេះថា កម្ពុជានឹងទទួលឥទ្ធិពលពីខ្យល់មូសុងនិរតីខ្លាំង The Strong Monsoon នៅតំបន់វាលទំនាបកណ្តាល បណ្តាខេត្តជាប់ជួរភ្នំដងរែក និងខ្ពង់រាបឦសាន រួមទាំងតំបន់មាត់សមុទ្រ នឹងអាចមានភ្លៀងធ្លាក់ពីមធ្យមទៅខ្លាំង ចាប់ពីថ្ងៃទី១៩ ខែឧសភា ដល់ថ្ងៃទី២៥ ខែឧសភា ឆ្នាំ២០២១នេះ។
តំបន់ទាំង៣ដែលរងផលប៉ះពាល់នោះ រួមមាន បណ្តាខេត្តនៅតំបន់វាលទំនាបកណ្តាល សីតុណ្ហភាពអប្បបរមាមានពី២៥អង្សាទៅ២៧អង្សា សីតុណ្ហភាពអតិបរមាមានពី៣២អង្សាទៅ៣៤អង្សា នឹងអាចមានភ្លៀងធ្លាក់រាយប៉ាយក្នុងកម្រិតពីមធ្យមទៅច្រើន ហើយនៅក្នុងនោះក៏អាចមានផ្នែកមួយចំនួនមានភ្លៀងធ្លាក់ខ្លាំង។
ចំណែកនៅបណ្តាខេត្តជាប់ជួរភ្នំដងរែកនិងខ្ពង់រាបឦសាន សីតុណ្ហភាពអប្បបរមាមានពី២៤អង្សាទៅ២៦អង្សា សីតុណ្ហភាពអតិបរមាមានពី៣១អង្សាទៅ៣៣អង្សា នឹងអាចមានភ្លៀងធ្លាក់រាយប៉ាយនៅក្នុងកម្រិតពីមធ្យមទៅច្រើន។
រីឯនៅតំបន់មាត់សមុទ្រឯណោះវិញ សីតុណ្ហភាពអប្បបរមាមានពី២៤អង្សាទៅ២៦អង្សា សីតុណ្ហភាពអតិបរមាមានពី៣១អង្សាទៅ៣៣អង្សា នឹងអាចមានភ្លៀងធ្លាក់ពីមធ្យមទៅខ្លាំង ហើយនៅលើផ្ទៃសមុទ្រអាចមានភ្លៀងធ្លាក់ខ្លាំង ជាមួយនឹងខ្យល់បក់ខ្លាំងនិងរលកសមុទ្រខ្ពស់ជាដើម។
ករណីនេះ ក្រសួងធនធានទឹក និងឧតុនិយម ប្រាប់ទៅពលរដ្ឋ ជាពិសេសអ្នករស់នៅតំបន់មាត់សមុទ្រ និងអ្នកនេសាទ រួមទាំងអ្នកទេសចរតាមផ្លូវទឹក ត្រូវមានការប្រុងប្រយ័ត្នចំពោះល្បឿនខ្យល់ខ្លាំងនិងរលកសមុទ្រខ្ពស់៕
