(ភ្នំពេញ)៖ រយៈពេល៧ខែដំបូងឆ្នាំ២០២២នេះ ខេត្តសៀមរាបទាំងមូលទទួលបានភ្ញៀវទេសចរសរុបចំនួន១,២៤២,៨៥៤នាក់ កើនឡើង៨៩០.១៧% ប្រៀបធៀបពេលដូចគ្នានៅឆ្នាំ២០២១ ក្នុងនោះមានភ្ញៀវទេសចរជាតិចំនួន១,១៥៩,០០០នាក់ និងភ្ញៀវទេសចរអន្តរជាតិចំនួន៨៣,៨៥៤នាក់។
បើតាមឯកឧត្តមរដ្ឋមន្ត្រីក្រសួងទេសចរណ៍បានបញ្ជាក់ថា ភ្ញៀវទេសចរដែលចូលមកកម្សាន្តក្នុងខេត្តសៀមរាបក្នុងរយៈពេលខែមករា ដល់ខែកក្កដា ឆ្នាំ២០២២ គឺមានចំនួន១,២៤២,៨៥៤នាក់ កើនឡើង ៨៩០.១៧%ប្រៀបធៀបរយៈពេលដូចគ្នានៅឆ្នាំ២០២១ (ចំនួន១២៥,៥១៩នាក់) ដែលក្នុងនោះភ្ញៀវទេសចរជាតិមានចំនួន១,១៥៩,០០០នាក់ កើនឡើង៧៩៨.៤៦% និងភ្ញៀវទេសចរអន្តរជាតិមានចំនួន៨៣,៨៥៤នាក់ កើនឡើង១៣៥១.៧៧%។
ឯកឧត្តមបានបន្តថា ក្នុងរយៈពេល ដូចគ្នានេះដែរ ជើងហោះហើរក្រៅប្រទេសដែលចូលមកកាន់ខេត្តសៀមរាបមានចំនួន៥៥០ជើង និងមានអ្នកដំណើរសរុបចំនួន៤៨,៧៦៥នាក់ ក្នុងនោះក្រុមហ៊ុន Singapore Airline (សិង្ហបុរី-សៀមរាប) ក្រុមហ៊ុន Air Asia (គូឡាឡាំពួរ-សៀមរាប និងបាងកក-សៀមរាប) ក្រុមហ៊ុន Cambodia Angkor Air (ហូជីមីញ-សៀមរាប និងដាណាង-សៀមរាប) ក្រុមហ៊ុន Vietnam Airline (ហូជីមីញ-សៀមរាប) ក្រុមហ៊ុន Thai Smile (បាងកក-សៀមរាប) ក្រុមហ៊ុន China Eastern (គួនមីង-សៀមរាប) ក្រុមហ៊ុន Bangkok Air (បាងកក-សៀមរាប) ក្រុមហ៊ុន Air Iceland (កោះហ្កាំ-សៀមរាប)។
គួរបញ្ជាក់ដែរថា ជើងហោះហើរក្នុងស្រុក ភ្នំពេញ-សៀមរាប ដែលកំពុងប្រតិបត្តិការសព្វថ្ងៃគឺដោយក្រុមហ៊ុន Cambodia Angkor Air និងក្រុមហ៊ុន Cambodia Airway។ បន្ថែមពីនេះ ក្រុមហ៊ុន Cambodia Angkor Air ក៏មានជើងហោះហើរ កំពង់សោម-សៀមរាប ផងដែរ។ ដោយតាមស្ថិតិ បង្ហាញថា ជើងហោះហើរសរុបរបស់ក្រុមហ៊ុន Cambodia Angkor Air ភ្នំពេញ-សៀមរាប មានចំនួន១៤៥ជើង និងកំពង់សោម-សៀមរាប មានចំនួន១៣ជើង។ ក្រៅពីនោះមានក្រុមហ៊ុន Cambodia Airway ភ្នំពេញ-សៀមរាប មានចំនួន៣ជើង។
យោងតាមស្ថិតិខាងលើនេះបង្ហាញថា ភ្ញៀវទេសចរអន្តរជាតិចូលមកខេត្តសៀមរាបតាមផ្លូវអាកាសមានប្រមាណ៧០%នៃចំនួនភ្ញៀវអន្តរជាតិសរុប។ មកដល់ពេលនេះមានការហោះហើរ៧-៨ជើងក្នុងមួយថ្ងៃ មានអ្នកដំណើរជាមធ្យម៧០០-៨០០នាក់ក្នុងមួយថ្ងៃ។
ឯកឧត្តមរដ្ឋមន្ត្រី ថោង ខុន មានសេចក្តីរីករាយជាមួយនឹងកំណើនភ្ញៀវទេសចរនៅខេត្តសៀមរាបយ៉ាងដូច្នេះ ហេតុដូចនេះក្នុងនាមជាពលរដ្ឋ អាជីវកម្ម និងមន្ត្រីរាជការក៏គប្បីមានសេចក្តីរីករាយជាមួយលទ្ធផលវិជ្ជមានមួយនេះ រួមជាមួយនឹងការខិតខំប្រឹងប្រែងអភិវឌ្ឍផលិតភាពការងារតាមវិជ្ជាជីវៈរៀងខ្លួនឲ្យកាន់តែប្រសើរឡើង៕
ប្រភព៖ ក្រសួងទេសចរណ៍
សម្រួលដោយ៖ សូរីយ៉ាភ័ណ្ឌ
