អតីតរដ្ឋមន្ត្រីហិរញ្ញវត្ថុ លោក រីស៊ី ស៊ូណាក់ (Rishi Sunak) នៅថ្ងៃចន្ទនេះបានទទួលជ័យជម្នះ ក្នុងការប្រកួតប្រជែងយកតំណែងជានាយករដ្ឋមន្ត្រីអង់គ្លេសជំនួសលោកស្រី លីស ត្រាស់ ដែលទើបនឹងលាលែងចេញពីតំណែងកាលពីសប្ដាហ៍មុន និងក្រោយលោកស្រី Penny Mordaunt ជាគូប្រជែងប្រកាសដកខ្លួន។ តាមរយៈជ័យជម្នះនេះលោក ស៊ូណាក់ នឹងក្លាយជានាយករដ្ឋមន្ត្រីអង់គ្លេសដំបូងគេមានដើមកំណើតអាស៊ី។
* តើលោក ស៊ូណាក់ ជានរណា?
លោក រីស៊ី ស៊ូណាក់ (Rishi Sunak) កើតនៅឆ្នាំ១៩៨០ ក្នុងទីក្រុង Southampton ចក្រភពអង់គ្លេស។ លោកជាកូនប្រុសចម្បងក្នុងចំណោមកូន៣នាក់ មកពីគ្រួសារអន្តោប្រវេសន៍ មានដើមកំណើតជាជនជាតិឥណ្ឌា។ លោកមានឪពុកជាវេជ្ជបណ្ឌិត និងមានម្ដាយជាឱសថការី។ លោក ស៊ូណាក់ បានចូលរៀននៅសាលា Winchester College និងបានបញ្ចប់ការសិក្សាថ្នាក់ទស្សនវិជ្ជា នយោបាយ និងសេដ្ឋកិច្ច នៅឯសាកលវិទ្យាល័យ Oxford University ហើយក្រោយមកទៀត ទើប លោកទទួលបានសញ្ញាប័ត្រ MBA នៅឯសាកលវិទ្យាល័យ Stanford University ជាទីដែលលោកបានជួបភរិយារបស់លោកសព្វថ្ងៃគឺលោកស្រី Akshata Murthy ជាកូនស្រីមហាសេដ្ឋីឥណ្ឌាម្នាក់។
មុននឹងប្រឡូកចូលឆាកនយោបាយ លោក ស៊ូណាក់ ធ្លាប់បានធ្វើការជាច្រើនខាងធនាគារ និងហិរញ្ញវត្ថុ។ លោកក៏ធ្លាប់ជាអ្នកវិភាគមួយរូប នៅឯធនាគារ Goldman Sachs ផងដែរ។ ក្នុងឆ្នាំ២០១៤ លោក ស៊ូណាក់ បានជាប់ឆ្នោតជាបេក្ខជននៃគណបក្សអភិរក្សនិយប្រចាំតំបន់ Yorkshire និងនៅឆ្នាំ២០១៥ លោកបានជាប់ឆ្នោត ជាសមាជិកសភាអង់គ្លេស។
លោក ស៊ូណាក់ ត្រូវបានតែងតាំងជារដ្ឋមន្ត្រីហិរញ្ញវត្ថុ នៅក្រោមរដ្ឋាភិបាលអតីតនាយករដ្ឋមន្ត្រី លោក បូរីស ចនសុន ហើយលោកបានកាន់តំណែងនេះពីថ្ងៃទី១៣ ខែកុម្ភៈ ឆ្នាំ២០២០ រហូតដល់ថ្ងៃទី៥ ខែកក្កដា ឆ្នាំ២០២២។ លោក ស៊ូណាក់ ក៏ធ្លាប់បានចូលរួមប្រកួតប្រជែងយកតំណែងជានាយករដ្ឋមន្ត្រីជំនួសលោក ចនសុន ដែរ តែលោក បានបរាជ័យក្រោមថ្វីដៃលោកស្រី លីស ត្រាស់ដែលបានលាលែងពីតំណែងកាលពីសប្ដាហ៍មុន៕
