(ឡុងដ៍)៖ សមាគមកសិកម្មឈានមុខមួយបានព្រមានថា ចក្រភពអង់គ្លេសអាចប្រឈមមុខនឹងការខ្វះខាតស្បៀងអាហាររហូតដល់ខែឧសភា បន្ទាប់ពីអាកាសធាតុអាក្រក់នៅអាហ្វ្រិកខាងជើង និងពន្យារពេលដាំដុះនៅក្នុងស្រុក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃសុក្រ ទី២៤ ខែកុម្ភៈ ឆ្នាំ២០២៣។
សមាគមអ្នកដាំ Lea Valley បាននិយាយថា ខ្សែសង្វាក់ផ្គត់ផ្គង់បច្ចុប្បន្នកំពុងជួបបញ្ហាការនាំចូល ហើយកាន់តែធ្ងន់ធ្ងរដោយកសិករចក្រភពអង់គ្លេសបានពន្យារពេលដាំដំណាំដោយសារតែតម្លៃថាមពលខ្ពស់។
ប្រទេសអាហ្រ្វិកខាងជើងដែលជាប្រទេសអ្នកផ្គត់ផ្គង់ដ៏ធំ បានមើលឃើញសីតុណ្ហភាពត្រជាក់ ភ្លៀង និងទឹកជំនន់ជាច្រើនសប្តាហ៍ ដែលបានប៉ះពាល់ដល់សមត្ថភាពរបស់កសិករ និងអ្នកផ្គត់ផ្គង់ក្នុងការប្រមូលផល និងដឹកជញ្ជូនដំណាំ។
គួរបញ្ជាក់ថា ចក្រភពអង់គ្លេសត្រូវនាំចូលផ្លែឈើ និងបន្លែក្រៅរដូវជាច្រើនក្នុងរដូវរងារ ខណៈដែលប្រទេសម៉ារ៉ុក និងអេស្ប៉ាញដែលជាអ្នកនាំចូលនាំមុខគេលើដំណាំដូចជា ប៉េងប៉ោះ ត្រសក់ ម្ទេស និងពងទាជាដើម កំពុងទទួលរងពីលក្ខខណ្ឌអាកាសធាតុមិនល្អ និងជួបបញ្ហាដឹកជញ្ជូន។
ការធ្លាក់ចុះយ៉ាងខ្លាំង នៃការនាំចូលបាននាំឱ្យផ្សារទំនើបមួយចំនួន ដាក់កម្រិតលើបរិមាណផ្លែឈើ និងបន្លែមួយចំនួនពីប្រទេសម៉ារ៉ុក និងអេស្ប៉ាញ ដែលអតិថិជនអាចទិញបាន៕ 
