បំណុលសាធារណៈរបស់កម្ពុជានៅតែត្រូវបានវាយតម្លៃថាអាចគ្រប់គ្រងបានជាមួយនឹង ហានិភ័យទាប ទោះបីជាសេដ្ឋកិច្ចរបស់ប្រទេសត្រូវបានរងផលប៉ះពាល់ដោយជំងឺរាតត្បាត Covid-19 និងកត្តាខាងក្រៅផ្សេងទៀតក៏ដោយ។
បើតាមព្រឹត្តិបត្រស្ថិតិបំណុលសាធារណៈកម្ពុជាចេញផ្សាយកាលពីនៅថ្ងៃទី ០៩ ខែមិនា ឆ្នាំ ២០២៣ បានលើកឡើងថា គិតត្រឹមដំណាច់ឆ្នាំ 2022 រដ្ឋាភិបាលកម្ពុជាមានបំណុលសាធារណៈសរុបចំនួន 9.99 ពាន់លានដុល្លារ ដែលក្នុងនោះ 99.82 ភាគរយ ឬ 9.97 ពាន់លានដុល្លារជាបំណុលសាធារណៈពីដៃគូអភិវឌ្ឍន៍ទ្វេភាគី និងដៃគូអភិវឌ្ឍន៍ពហុភាគី ហើយ 17.51 លានដុល្លារ។
ព្រឹត្តិបត្រដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុបានឲ្យដឹងថា កម្ពុជាបានចុះហត្ថលេខាខ្ចីប្រាក់ចំនួន ៤,០០១ លានដុល្លារពីប្រទេសចិន, ១,០៧៧ លានដុល្លារពីប្រទេសជប៉ុន, ៤៨២ លានដុល្លារពីសាធារណរដ្ឋកូរ៉េ, ៤៧៣ លានដុល្លារពីប្រទេសបារាំង និង ២៨ លានដុល្លារពីប្រទេសថៃ។
ប្រាក់កម្ចីទាំងអស់មានសម្បទានខ្ពស់ជាមួយនឹងជំនួយជាមធ្យមប្រហែល 41 ភាគរយ ហើយគោលបំណងនៃប្រាក់កម្ចី គឺដើម្បីផ្តល់ហិរញ្ញប្បទានដល់គម្រោងវិនិយោគសាធារណៈនៅក្នុង វិស័យអាទិភាពដែលគាំទ្រដល់កំណើនសេដ្ឋកិច្ចប្រកបដោយនិរន្តរភាពរយៈពេលវែង និងបង្កើនផលិតភាព។
សូចនាករបំណុលសំខាន់ បំណុលខាងក្រៅ ធៀបនឹងផលិតផលក្នុងស្រុកសរុបគឺមានចំនួន 24.9 ភាគរយបើធៀបនឹងកម្រិត 40 ភាគរយ។
ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានមានប្រសាសន៍នៅក្នុងព្រឹត្តិបត្រថា ការរក្សាបំណុលសាធារណៈប្រកបដោយនិរន្តរភាពគឺដោយសារតែប្រទេសកម្ពុជាមានប្រព័ន្ធបំណុលសាធារណៈដ៏រឹងមាំ តាមរយៈកំណែទម្រង់ដ៏មុតស្រួចជាបន្តបន្ទាប់។ «ការគ្រប់គ្រងបំណុលសាធារណៈប្រកបដោយនិរន្តរភាព និងប្រសិទ្ធភាពបានរួមចំណែកយ៉ាងសំខាន់ក្នុងការសម្រេចបាននូវកំណើនសេដ្ឋកិច្ចប្រកបដោយមោទនភាពក្នុងរយៈពេលពីរទសវត្សរ៍កន្លងមកនេះ ក៏ដូចជាធ្វើឱ្យកម្ពុជាមានលទ្ធភាពប្រមូលឥណទានសម្បទានបន្ថែមទៀត ដើម្បីបំពេញតម្រូវការហិរញ្ញវត្ថុនៃវិស័យអាទិភាព»៕
ដោយ សុខ សិទ្ធិការ្យ
