ចិន គឺជាប្រទេសនាំចូលអង្ករពីកម្ពុជាច្រើនជាងគេ ពោលគឺស្មើននឹង ៤៨ភាគរយ ខណៈការនាំចេញទៅប្រទេសប៉ែកអឺរ៉ុបចំនួន២២ ស្មើនឹង ៣៦ភាគរយ។ នេះបើតាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា។
នៅក្នុងត្រីមាសទី១ ឆ្នាំ២០២៣ កម្ពុជា រកចំណូលបានពីការនាំចេញអង្ករសរុបចំនួន ១២៦លានដុល្លារ និងនាំចេញស្រូវ បានចំនួន ៣៩០លានដុល្លារ។ ដោយក្នុងនោះ ការនាំចេញអង្ករបានចំនួន ១៧៦៥៨១តោន ទៅកាន់៤២ទីផ្សារគោលដៅ។ ដោយឡែកបរិមាណស្រូវ ដែលបាននាំចេញបានចំនួន ១,៥៦០,៥១២តោន ទៅកាន់ប្រទេសវៀតណាម។
ឧកញ៉ា ចាន់ សុឃាំង ប្រធានសហព័ន្ធស្រូវ អង្ករកម្ពុជា បានលើកឡើងថា ផែនការសកម្មភាពរបស់សហព័ន្ធស្រូវ អង្ករកម្ពុជា សម្រាប់អាណត្តិទី៤នេះ គឺសំដៅជំរុញផលិតកម្មស្រូវ និងនាំចេញអង្ករ ដោយកំណត់យកគោលដៅនាំចេញអង្ករចំនួន ៧៥ម៉ឺនតោន ក្នុងឆ្នាំ២០២៣ និងឈានដល់១លានតោនក្នុងឆ្នាំ២០២៥។ ក្នុងនោះ ការនាំចេញទៅទីផ្សារប្រទេសចិនចំនួន ៤០ម៉ឺនតោន។ លោកឧកញ៉ាលើកឡើងបែបនេះ នៅក្នុងជំនួបជាមួយលោករដ្ឋមន្រ្តីក្រសួងពាណិជ្ជកម្មកាលពីខែកុម្ភៈ ឆ្នាំ ២០២៣ កន្លងទៅ។
នៅក្នុងជំនួបពិភាក្សារវាងវិស័យរដ្ឋ និងឯកជន ដើម្បីជំរុញវិស័យស្រូវ-អង្ករកម្ពុជា កាលពីខែ កុម្ភៈ ដដែលនោះ លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ក៏បានណែនាំវិស័យឯកជន ពិសេសសហព័ន្ធស្រូវអង្ករកម្ពុជា ជំរុញបង្កើនកិច្ចសហប្រតិបត្តិការរវាងវិស័យឯកជន និងសហភាពអឺរ៉ុប តាមរយៈការផ្លាស់ប្តូរព័ត៌មានទីផ្សារ និងលក្ខខណ្ឌតម្រូវសម្រាប់ការនាំចេញ ព្រមទាំងបទពិសោធន៍នានា សំដៅជំរុញវិស័យស្រូវអង្ករកម្ពុជា ឱ្យបានកាន់តែប្រសើរឡើង៕
