ក្រសួងការពារជាតិជប៉ុនបាននិយាយកាលពីថ្ងៃពុធថា យន្តហោះទម្លាក់គ្រាប់បែកយុទ្ធសាស្ត្រចិន និងរុស្ស៊ីបានធ្វើការហោះហើររួមគ្នាលើដែនទឹកជុំវិញប្រទេសជប៉ុន ។យន្តហោះទម្លាក់គ្រាប់បែករុស្ស៊ី និងចិនសរុប ៤ គ្រឿង បានហោះចេញពីទិសដៅភាគខាងត្បូងរបស់ចិនលើសមុទ្រចិនខាងកើត បន្ទាប់មកធ្វើដំណើរចន្លោះកោះ Okinawa និងកោះ Miyakojima មុនពេលហោះទៅដល់មហាសមុទ្រប៉ាស៊ីហ្វិក ។
ក្រសួងបញ្ជាក់ថា ក្រោយមកយន្តហោះទម្លាក់គ្រាប់បែកទាំង ៤ គ្រឿងនេះបានហោះតាមផ្លូវដដែលត្រឡប់ទៅសមុទ្រចិនខាងកើតវិញ មុនពេលដែលហោះចែកផ្លូវគ្នាឆ្ពោះទៅទិសដៅប្រទេសរបស់ពួកគេរៀងៗខ្លួន ហើយអំឡុងពេលហោះហើររួមគ្នានោះ មិនមែនមានត្រឹមតែយន្តហោះ ៤ គ្រឿងនេះឡើយ ពោលវាក៏ត្រូវបានអមដោយយន្តហោះចម្បាំងចិន ១៥ គ្រឿង និងយន្តហោះរុស្សី ២ គ្រឿងទៀតផងដែរ ។ក្រសួងនិយាយទៀតថា ការហោះហើររួមគ្នានេះ គឺជាសញ្ញាបញ្ជាក់យ៉ាងច្បាស់នៃការបង្កហេតុឆ្ពោះមកកាន់ប្រទេសជប៉ុន ខណៈរដ្ឋាភិបាលទីក្រុងតូក្យូក៏បានបង្ហាញពីការព្រួយបារម្ភយ៉ាងខ្លាំងផងដែរ ទៅកាន់ប្រទេសទាំងពីរតាមរយៈបណ្ដាញការទូត ។
គួរបញ្ជាក់ថា នេះជាលើកទី៧ ហើយដែលចិន និងរុស្ស៊ីបានធ្វើការហោះហើររួមគ្នានៅជិតប្រទេសជប៉ុន ចាប់តាំងពីខែកក្កដា ឆ្នាំ២០១៩ មក ប៉ុន្តែពេលនេះគឺជាលើកទីមួយហើយដែលសកម្មភាពបែបនេះ ត្រូវបានធ្វើឡើងរយៈពេល ២ ថ្ងៃជាប់ៗគ្នា ៕
