កូរ៉េខាងត្បូងបានកោះហៅឯកអគ្គរដ្ឋទូតចិននៅថ្ងៃសុក្រទី ៩ ខែមិថុនា ដើម្បីចេញការតវ៉ាដោយពណ៌នាការអត្ថាធិប្បាយដែលធ្វើឡើងដោយបេសកជនដែលបានព្រមានថាទីក្រុងសេអ៊ូលគិតខុសសម្រាប់ការជ្រើសរើសអាម៉េរិកជំនួសឱ្យចិននៅក្នុងការប្រជែងគ្នារវាងអាម៉េរិក និងចិនថាជាការបង្កហេតុ និងការជ្រៀតជ្រែកដែលអាចកើតមាននៅក្នុងកិច្ចការផ្ទៃក្នុង។ឯកអគ្គរដ្ឋទូតចិនប្រចាំទីក្រុងសេអ៊ូល លោក ស៊ីង ហៃមីង (Xing Haiming) បានកត់សម្គាល់ក្នុងអំឡុងពេលកិច្ចប្រជុំមួយកាលពីល្ងាចថ្ងៃព្រហស្បតិ៍ជាមួយលោក Lee Jae-myung ប្រធានគណបក្សប្រឆាំងដ៏សំខាន់របស់កូរ៉េខាងត្បូង ជាកន្លែងដែលលោកក៏បានជំរុញឱ្យទីក្រុងសេអ៊ូលបញ្ឈប់ការផ្តាច់ទំនាក់ទំនងពីប្រទេសចិន និងស្តារទំនាក់ទំនងសេដ្ឋកិច្ច និងការទូតឡើងវិញ។ លោក ស៊ីង បានស្ដីបន្ទោសទីក្រុងសេអ៊ូលថាបានបង្កើតភាពលំបាកនៅក្នុងទំនាក់ទំនងទ្វេភាគី ដោយការមិនគោរពផលប្រយោជន៍ស្នូលរបស់ទីក្រុងប៉េកាំង រួមទាំងលើកោះតៃវ៉ាន់ ខណៈដែលកំពុងរងឥទ្ធិពលពីសហរដ្ឋអាម៉េរិក។លោកបានសង្កតធ្ងន់ថា៖«ទំនាក់ទំនងចិន-កូរ៉េខាងត្បូងប្រឈមមុខនឹងការលំបាកជាច្រើន។ យើងសង្ឃឹមថាភាគីកូរ៉េខាងត្បូងនឹងរក្សាការសន្យារបស់ខ្លួនដោយស្មោះត្រង់ និងគោរពយ៉ាងច្បាស់នូវកង្វល់ស្នូលរបស់ចិន ដូចជាបញ្ហាតៃវ៉ាន់ជាដើម»។ លើសពីនោះ លោក ស៊ីង បានព្រមានប្រឆាំងនឹងការធ្វើឱ្យមានការវិនិច្ឆ័យខុសលើប្រទេសចិនដោយសារតែការជ្រៀតជ្រែកនៃកត្តាខាងក្រៅ ដូចជាសម្ពាធរបស់សហរដ្ឋអាម៉េរិក។ លោកបានបន្តថា៖ «ខ្ញុំអាចធានាចំពោះអ្នកថា អ្នកដែលភ្នាល់លើការបរាជ័យរបស់ប្រទេសចិនច្បាស់ជាសោកស្ដាយ»។
ទាក់ទិននឹងការលើកឡើងនេះ ក្រសួងការបរទេសកូរ៉េខាងត្បូង បានបញ្ជាក់ថា អនុរដ្ឋមន្ត្រីការបរទេសទីមួយរបស់កូរ៉េខាងត្បូងលោក Chang Ho-jin បានកោះហៅលោក ស៊ីង ហើយព្រមានអំពីសុន្ទរកថា ជាការបង្កហេតុ និងដើម្បីបង្ហាញពីការសោកស្ដាយយ៉ាងខ្លាំង។លោក Chang បាននិយាយថា ការរិះគន់គោលនយោបាយរបស់ទីក្រុងសេអ៊ូលដោយបើកចំហជាមួយនឹងខ្លឹមសារមិនពិត និងការបញ្ចេញមតិដែលមិនអាចអត់ឱនបាន អាចបង្កើតជាទង្វើនៃការជ្រៀតជ្រែកក្នុងនយោបាយក្នុងស្រុក។ ក្រសួងបានឱ្យដឹងនៅក្នុងសេចក្តីថ្លែងការណ៍មួយថា លោក Chang បានព្រមានលោកឯកអគ្គរដ្ឋទូត ស៊ីង យ៉ាងច្បាស់ថា លោកនឹងទទួលខុសត្រូវចំពោះផលវិបាកទាំងអស់។នៅពេលសួរអំពីការរិះគន់របស់ភាគីកូរ៉េខាងត្បូង អ្នកនាំពាក្យក្រសួងការបរទេសចិន លោក Wang Wenbin បាននិយាយនៅក្នុងសន្និសីទសារព័ត៌មាននៅទីក្រុងប៉េកាំងថា បញ្ហាប្រឈមនាពេលបច្ចុប្បន្នក្នុងទំនាក់ទំនងចិន និងកូរ៉េខាងត្បូង មិនមែនបណ្តាលមកពីប្រទេសចិនទេ។ លោកបន្ថែមថា៖«វាគឺជាផ្នែកមួយនៃការងាររបស់លោកឯកអគ្គរដ្ឋទូត ស៊ីង ក្នុងការចូលរួមយ៉ាងទូលំទូលាយជាមួយរដ្ឋាភិបាលកូរ៉េខាងត្បូង គណបក្សនយោបាយ និងប្រជាជនមកពីគ្រប់មជ្ឈដ្ឋាន ផ្លាស់ប្ដូរទស្សនៈលើទំនាក់ទំនងទ្វេភាគី និងបញ្ហាដែលមានផលប្រយោជន៍ទៅវិញទៅមក និងចែករំលែកជំហរ និងកង្វល់របស់ប្រទេសចិន»។ លោក Wang ក៏បានជំរុញឱ្យទីក្រុងសេអ៊ូលប្រកាន់ខ្ជាប់នូវគោលការណ៍ចិនតែមួយ និងដោះស្រាយបញ្ហាពាក់ព័ន្ធនឹងតៃវ៉ាន់ដោយប្រុងប្រយ័ត្ន ដោយបន្ថែមថាបញ្ហាតៃវ៉ាន់គឺជាកិច្ចការផ្ទៃក្នុងរបស់ចិនសុទ្ធសាធ៕
