មេដឹកនាំកូរ៉េខាងជើង លោក គីម ជុងអ៊ុន បានប្តេជ្ញាថា នឹងពួតដៃគ្នាជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ដើម្បីជំរុញកិច្ចសហប្រតិបត្តិការយុទ្ធសាស្ត្រលើគោលដៅរួមគ្នារបស់ពួកគេ ក្នុងការកសាងប្រទេសដ៏មានឥទ្ធិពលមួយ នេះបើយោងតាមប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃចន្ទទី១២ ខែមិថុនានេះ...។លោក គីម បានសន្យានៅក្នុងសារមួយទៅកាន់លោក ពូទីន ដែលប្រារព្ធទិវាជាតិរបស់រុស្ស៊ី ដោយការពារការសម្រេចចិត្តរបស់មេដឹកនាំរុស្ស៊ីក្នុងការឈ្លានពានអ៊ុយក្រែន និងបង្ហាញពីការគាំទ្រយ៉ាងពេញលេញ និងសាមគ្គីភាព។ លោក គីម បាននិយាយនៅក្នុងសារដែលចេញផ្សាយដោយ KCNA ថា៖«យុត្តិធម៌គឺប្រាកដថានឹងឈ្នះ ហើយប្រជាជនរុស្ស៊ី នឹងបន្តបន្ថែមសិរីរុងរឿងដល់ប្រវត្តិសាស្ត្រនៃជ័យជម្នះ»។ បន្ថែមពីនោះ លោក គីម បានអំពាវនាវឱ្យមានកិច្ចសហប្រតិបត្តិការយុទ្ធសាស្ត្រកាន់តែជិតស្និទ្ធជាមួយទីក្រុងមូស្គូ កាន់ដៃយ៉ាងរឹងមាំជាមួយប្រធានាធិបតីរុស្ស៊ី ដោយអនុលោមតាមបំណងប្រាថ្នារួមរបស់ប្រជាជននៃប្រទេសទាំងពីរដើម្បីសម្រេចបាននូវគោលដៅធំនៃការកសាងប្រទេសដ៏មានឥទ្ធិពលមួយ។ កូរ៉េខាងជើងបានព្យាយាមបង្កើតទំនាក់ទំនងកាន់តែជិតស្និទ្ធជាមួយវិមានក្រឹមឡាំង និងគាំទ្រទីក្រុងមូស្គូ បន្ទាប់ពីទីក្រុងមូស្គូបានលុកលុយអ៊ុយក្រែនកាលពីឆ្នាំមុន ដោយបានបន្ទោសលើគោលនយោបាយអនុត្តរភាព និងអាកប្បកិរិយាឈ្លានពានរបស់សហរដ្ឋអាម៉េរិក និងលោកខាងលិច។ កូរ៉េខាងជើង ជាប្រទេសមួយក្នុងចំណោមប្រទេសតែមួយគត់ដែលទទួលស្គាល់ឯករាជ្យភាពនៃតំបន់ដាច់ចេញពីអ៊ុយក្រែន ហើយប្រទេសនេះ បានបង្ហាញការគាំទ្រចំពោះការប្រកាសរបស់រុស្ស៊ីនូវការបញ្ចូលផ្នែកខ្លះនៃអ៊ុយក្រែន។
ពាណិជ្ជកម្មនៅច្រកផ្លូវដែកសំខាន់រវាងរុស្ស៊ី និងកូរ៉េខាងជើង បានស្ទុះងើបឡើងវិញក្នុងប៉ុន្មានខែនេះ ដោយសារសង្គ្រាមអ៊ុយក្រែននាំឱ្យទំនាក់ទំនងសេដ្ឋកិច្ចកាន់តែស៊ីជម្រៅរវាងប្រទេសទាំងពីរ។ អ្នកជំនាញបានលើកឡើងថា ពាណិជ្ជកម្មភាគច្រើនរបស់កូរ៉េខាងជើងឆ្លងកាត់ប្រទេសចិន ប៉ុន្តែរុស្ស៊ី គឺជាដៃគូដ៏សំខាន់ផងដែរ ជាពិសេសសម្រាប់ការផ្ដល់ប្រេង។ ទីក្រុងមូស្គូបានបដិសេធមិនបំពានលើទណ្ឌកម្មរបស់អង្គការសហប្រជាជាតិ ប៉ុន្តែនាវាដឹកប្រេងរបស់រុស្ស៊ីត្រូវបានចោទប្រកាន់ថា បានជួយគេចពីការនាំចេញប្រេងទៅកាន់ប្រទេសកូរ៉េខាងជើង ហើយអ្នកឃ្លាំមើលការដាក់ទណ្ឌកម្មបានរាយការណ៍ថា កម្មករនៅតែស្ថិតក្នុងប្រទេសរុស្ស៊ី ទោះបីជាមានការហាមឃាត់ក៏ដោយ។ មន្ត្រីរុស្ស៊ីបានពិភាក្សាដោយបើកចំហលើការរៀបចំនយោបាយ ដើម្បីផ្តល់ការងារដល់កម្មករកូរ៉េខាងជើងពី២ម៉ឺនទៅ៥ម៉ឺននាក់ ទោះបីជាមានសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលហាមឃាត់ការរៀបចំបែបនេះក៏ដោយ។
ក្នុងកិច្ចខិតខំប្រឹងប្រែងជួយដល់ទីក្រុងព្យុងយ៉ាង ប្រទេសរុស្ស៊ីបានចូលរួមជាមួយប្រទេសចិន ក្នុងការប្រឆាំងនឹងការដាក់ទណ្ឌកម្មថ្មីលើកូរ៉េខាងជើង ដោយបានវេតូការជំរុញដែលដឹកនាំដោយសហរដ្ឋអាម៉េរិកនៅក្នុងខែឧសភា និងបានបំបែកជាសាធារណៈនូវក្រុមប្រឹក្សាសន្តិសុខអង្គការសហប្រជាជាតិ (UNSC) ជាលើកដំបូង ចាប់តាំងពីក្រុមនេះបានចាប់ផ្តើមដាក់ទណ្ឌកម្មទីក្រុងព្យុងយ៉ាងក្នុងឆ្នាំ២០០៦។ គួររំឭកថា កាលពីពេលថ្មីៗនេះ អ្នកនាំពាក្យសន្តិសុខជាតិអាម៉េរិក លោក ចន ឃឺប៊ី (John Kirby) បានអះអាងថា រុស្ស៊ីបានបញ្ជូនគណៈប្រតិភូទៅកូរ៉េខាងជើង ដើម្បីពិភាក្សាអំពីការផ្ដល់អាហារជាថ្នូរនឹងអាវុធជាមួយទីក្រុងព្យុងយ៉ាង។ លោក ឃឺប៊ី បាននិយាយថា កិច្ចព្រមព្រៀងសព្វាវុធណាមួយរវាងកូរ៉េខាងជើង និងរុស្ស៊ី នឹងបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ កន្លងមក អាម៉េរិក បានចោទប្រកាន់កូរ៉េខាងជើងថា បានផ្គត់ផ្គង់សព្វាវុធដល់យោធារុស្ស៊ីនៅអ៊ុយក្រែន និងក្រុមទាហានស៊ីឈ្នួលរុស្ស៊ី Wagner។ យ៉ាងណាមិញ ទីក្រុងព្យុងយ៉ាងបានបដិសេធការអះអាងទាំងនេះ៕
