ប្រធានាធិបតីអ៊ុយក្រែន លោក វ៉ុលឌីមៀរ ហ្សេលេនស្គី បានថ្លែងកាលពីថ្ងៃសៅរ៍ថា ប្រតិបត្តិការវាយបករំដោះទឹកដីពីយោធារុស្ស៊ី បានចាប់ផ្ដើមហើយ ខណៈនាយករដ្ឋមន្រ្តីកាណាដា លោក ចាស្ទីន ឌ្រូដូ ធ្វើដំណើរទស្សនកិច្ចទៅទីក្រុងកៀវ។
លោក ហ្សេលេនស្គី បាននិយាយក្នុងសន្និសីទសារព័ត៌មានរួមគ្នានៅទីក្រុងកៀវជាមួយ លោក ឌ្រូដូ ថា៖ «ប្រតិបត្តិការវាយបក និងការពារកំពុងធ្វើឡើងនៅអ៊ុយក្រែន។ នៅដំណាក់កាលនេះ ខ្ញុំនឹងមិននិយាយឱ្យលម្អិតនោះទេ»។ នេះបើតាមការស្រង់សម្ដីរបស់ទីភ្នាក់ងារព័ត៌មាន AFP។
ការអះអាងយ៉ាងដូច្នេះរបស់លោក ហ្សេលេនស្គី ធ្វើឡើងបន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បានអះអាងថា ប្រតិបត្តិការវាយបកជុំថ្មីរបស់អ៊ុយក្រែន ដែលគ្រោងទុកមកយូរហើយនោះ បានបរាជ័យរួចទៅហើយ។
យ៉ាងណាមិញ រុស្ស៊ីបានរាយការណ៍ពីការទប់ទល់នឹងការវាយប្រហាររបស់អ៊ុយក្រែន ទាំងនៅសមរភូមិ ភាគខាងកើត និងខាងត្បូង(អ៊ុយក្រែន) ដែលការណ៍នេះ ត្រូវបានអ្នកសង្កេតការណ៍ បកស្រាយថា ជាការចាប់ផ្ដើមនៃការប្រតិបត្តិការវាយបកទ្រង់ទ្រាយធំរបស់ក្រុងកៀវ។
ប្រតិកម្មទៅនឹងការលើកឡើងរបស់មេដឹកនាំរុស្ស៊ី លោក ហ្សេលេនស្គី បានថ្លែងផងដែរថា៖«វាគួរឱ្យចាប់អារម្មណ៍នូវអ្វីដែលពូទីន បាននិយាយអំពីប្រតិបត្តិការវាយបករបស់យើង។ វាជាការសំខាន់ណាស់ដែលរុស្ស៊ីតែងតែមានអារម្មណ៍បែបនេះ។ តាមគំនិតរបស់ខ្ញុំ ពួកគេមិនមានពេលយូរទេ»។
លោកបន្តថា លោកធ្វើការទាក់ទងជារៀងរាល់ថ្ងៃ ជាមួយមេបញ្ជាការយោធាអ៊ុយក្រែន រួមទាំងប្រធានកងកម្លាំងប្រដាប់អាវុធអ៊ុយក្រែន លោក Valery Zaluzhny ហើយថា«គ្រប់គ្នាសុទ្ធតែមើលឃើញពីភាពវិជ្ជមានឥឡូវនេះ សូមប្រាប់ទៅលោក ពូទីន»។
ក៏គួរកត់សម្គាល់ផងដែរថា ការមេដឹកនាំអ៊ុយក្រែនដដែល កើតឡើងបន្ទាប់ពីទំនប់វ៉ារីអគ្គីសនី កាខូវកា (Kakh ovka) ដែលស្ថិតនៅលើទន្លេនីរប៉ឺ ក្នុងតំបន់ភាគខាងត្បូង ឃឺរសុន រងការវាយប្រហារកាលពីថ្ងៃអង្គារ សប្ដាហ៍មុន។
ភាគីជម្លោះទាំងសងខាង បានទម្លាក់កំហុសគ្នាទៅវិញទៅមក ប៉ុន្តែលោកខាងលិច និងអ៊ុយក្រែន បានចោទប្រកាន់រុស្ស៊ី ថាជាអ្នកធ្វើការវាយប្រហារទំនប់ ដើម្បីរារាំងទ័ពអ៊ុយក្រែនមិនឱ្យឆ្លងទន្លេនីរប៉ឺក្នុងប្រតិបត្តិការវាយបករំដោះទឹកដីពីរុស្ស៊ី។
ក្នុងជំនួបជាមួយលោក ហ្សេលេនស្គី កាលពីថ្ងៃសៅរ៍ លោក ឌ្រូដូ បានថ្កោលទោសតួនាទីរបស់រុស្ស៊ី ក្នុងការវាយប្រហារទំបន់ ដែលធ្វើឱ្យទឹកជោរជន់ក្នុងតំបន់ភាគខាងក្រោម ហើយបានប្រកាសសន្យាផ្តល់ថវិកាចំនួន ១០លានដុល្លារកាណាដា (៧,៥ លានដុល្លារ) ដល់អ៊ុយក្រែន ដើម្បីជាមូលនិធិថ្មីសម្រាប់ជំនួយសង្គ្រោះទឹកជំនន់។
លោក ឌ្រូដូ បានថ្លែងថា៖ «គ្មានអ្វីគួរឱ្យសង្ស័យនៅក្នុងចិត្តរបស់យើងទេ ដែលថា ការបំផ្លិចបំផ្លាញទំនប់នេះ គឺជាផលវិបាកផ្ទាល់នៃការសម្រេចចិត្តរបស់រុស្ស៊ី»ក្នុងការឈ្លានពានអ៊ុយក្រែន។ លោកបន្តថា ក្រុងម៉ូស្គូនឹងទទួលខុសត្រូវចំពោះសកម្មភាពរបស់ខ្លួននៅអ៊ុយក្រែន។
ជាមួយគ្នានេះ លោក ឌ្រូដូ បានប្រកាសផ្តល់ជំនួយផ្នែកយោធាថ្មីដល់អ៊ុយក្រែន ចំនួន ៥០០លានដុល្លារ កាណាដា ខណៈសន្យាថា កាណាដា នឹងក្លាយជាផ្នែកមួយនៃកិច្ចខិតខំប្រឹងប្រែងពហុជាតិសាសន៍ក្នុងការបណ្តុះបណ្តាលអ្នកបើកយន្តហោះចម្បាំងដល់ទាហានអ៊ុយក្រែន។
បន្ថែមពីលើនេះ រដ្ឋាភិបាលទីក្រុងអូតាវ៉ា ក៏នឹងផ្តល់គ្រាប់រំសេវចំនួន ១០ ០០០ គ្រាប់ និងមីស៊ីលប្រភេទ AIM-7 ចំនួន ២៨៨ ដើម ដើម្បីឱ្យអ៊ុយក្រែនប្រើប្រាស់ក្នុងប្រព័ន្ធការពារដែនអាកាស ផងដែរ។
គួរបញ្ជាក់ថា នេះជាលើកទី២ហើយ ដែលលោក ឌ្រូដូ ធ្វើដំណើរទស្សនកិច្ចទៅទីក្រុងកៀវ ចាប់តាំងពីរុស្ស៊ីបើកការឈ្លានពានអ៊ុយក្រែនទ្រង់ទ្រាយធំកាលពីចុងខែកុម្ភៈ ឆ្នាំមុន។
តាមពិតទៅ កាណាដា គឺជាសម្ព័ន្ធមិត្តលោកខាងលិចដ៏សំខាន់មួយរបស់អ៊ុយក្រែន ដោយប្រទេសនេះ មិនត្រឹមតែផ្ដល់ជំនួយយោធានិងសេដ្ឋកិច្ច រាប់ពាន់លានដុល្លារដល់ក្រុងកៀវប៉ុណ្ណោះទេ ក៏ប៉ុន្តែក៏ជាប្រទេសមួយ ដែលទទួលជនភៀសខ្លួនអ៊ុយក្រែនដ៏ធំផងដែរ ស្របពេលដែលប្រទេសនេះ ក៏ចូលរួមជាមួយលោកខាងលិចផ្សេងទៀត រឹតករុស្ស៊ីតាមរយៈការដាក់ទណ្ឌកម្ម៕
