(សាំង ភីតធើស្បឺគ)៖ ប្រធានាធិបតីរុស្ស៉ី បាននិយាយថាការដាក់ពង្រាយអាវុធនុយក្លេអ៊ែរតាក់ទិកនៅលើទឹកដីបេឡារុស គឺជាសារព្រមានមួយរំឮកទៅកាន់ លោកខាងលិចថាពួកគេមិនអាចបំបាក់រុស្ស៉ីបាននោះឡើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី១៧ ខែមិថុនា ឆ្នាំ២០២៣។
លោក ពូទីន ធ្វើការកត់សម្គាល់ខាងលើ នាឱកាសចូលរួមវេទិកាសេដ្ឋកិច្ចមួយរៀបចំឡើងក្នុងទីក្រុង សាំង ភីតធើស្បឺគ (St Petersburg) នៅថ្ងៃសុក្រ សប្ដាហ៍នេះជាមួយការសង្កត់ធ្ងន់ថាក្បាលគ្រាប់នុយក្លេអ៊ែរតាក់ទិក ត្រូវបានបញ្ជូនទៅកាន់បេឡារុសរួចរាល់ហើយ។ ប៉ុន្តែ លោកនៅតែបញ្ជាក់ដដែលថារុស្ស៉ី បច្ចុប្បន្ន មើលមិនឃើញពីភាពចាំបាច់ ក្នុងការប្រើប្រាស់អាវុធនុយក្លេអ៊ែរនោះទេ។ លោក ពូទីន បានគូសបញ្ជាក់ដូច្នេះថា «ដូចដែលអ្នកទាំងអស់គ្នាបានដឹងថា យើងបានចរចាជាមួយសម្ព័ន្ធមិត្តរបស់យើង (លោកប្រធានាធិបតីបេឡារុស លូកាសិនកូ) និងថាយើងនឹងបញ្ជូនអាវុធនុយក្លេអ៊ែរតាក់ទិកទៅកាន់បេឡារុស ហើយរឿងនេះវាបានកើតឡើងរួចហើយ»។
គួរបញ្ជាក់ថា បើតាមលោក ពូទីន រុស្ស៉ីនឹងបញ្ចប់ការដាក់ពង្រាយអាវុធនុយក្លេអ៊ែរតាក់ទិកទាំងស្រុង នៅដំណាច់រដូវក្ដៅនេះ ឬក៏អាចនៅដំណាច់ ឆ្នាំ២០២៣នេះ៕
