ប្រទេសកម្ពុជាកំពុងអភិវឌ្ឍយ៉ាងឆាប់រហ័ស ដោយមានកំណើនសេដ្ឋកិច្ចកើនឡើងគួរឱ្យកត់សម្គាល់ក្នុងប៉ុន្មានឆ្នាំថ្មីៗនេះ។ ជាមួយនឹងអត្រាកំណើនផលិតផលក្នុងស្រុកសរុបចំនួន ៧.១% ក្នុងឆ្នាំ២០១៩ កម្ពុជាបាននិងកំពុងបោះជំហានទៅមុខក្នុងវិស័យផ្សេងៗ រួមទាំងកសិកម្ម ផលិតកម្ម និងទេសចរណ៍។ បញ្ហាប្រឈមដ៏សំខាន់បំផុតមួយ គឺបំពេញតម្រូវការថាមពលដែលកំពុងកើនឡើង ដើម្បីជំរុញកំណើនរបស់ខ្លួន។ ខណៈដែលសេដ្ឋកិច្ចរបស់កម្ពុជាកំពុងរីកចម្រើនទៅមុខ តម្រូវការអគ្គិសនីត្រូវបានរំពឹងថានឹងកើនឡើង ដែលតម្រូវអោយកម្ពុជាស្វែងរកប្រភពថាមពលជំនួស ដើម្បីធានាបាននូវអនាគតប្រកបដោយនិរន្តរភាព។
បច្ចុប្បន្ន កម្ពុជាពឹងផ្អែកខ្លាំងលើថាមពលវារីអគ្គិសនី និងឥន្ធនៈហ្វូស៊ីល ដើម្បីបំពេញតម្រូវការថាមពលរបស់ខ្លួន។ យោងតាមអាជ្ញាធរអគ្គិសនីកម្ពុជា វារីអគ្គិសនីមានប្រមាណ ៤៨% នៃផលិតកម្មថាមពលសរុបរបស់ប្រទេស ខណៈរោងចក្រថាមពលដើរដោយធ្យូងថ្មមានប្រមាណ ៤៧%។ ទោះជាយ៉ាងណាក៏ដោយ ការពឹងផ្អែកខ្លាំងលើវារីអគ្គីសនីបាននាំឱ្យមានបញ្ហាប្រឈមជាច្រើន ជាពិសេសក្នុងរដូវប្រាំង នៅពេលដែលកម្រិតទឹកនៅក្នុងទន្លេ និងអាងស្តុកទឹកមានកម្រិតទាប។ ប្រការនេះបានបណ្តាលឱ្យមានការដាច់ចរន្តអគ្គិសនីជាញឹកញាប់ ដែលប៉ះពាល់យ៉ាងធ្ងន់ធ្ងរដល់អាជីវកម្ម និងការរស់នៅរបស់ប្រជាជន។ដើម្បីដោះស្រាយបញ្ហាប្រឈមទាំងនេះ រដ្ឋាភិបាលកម្ពុជាបានទទួលស្គាល់តម្រូវការដើម្បីធ្វើពិពិធកម្មប្រភពថាមពលរបស់ខ្លួន និងបានកំណត់គោលដៅសម្រាប់ថាមពលកកើតឡើងវិញ។ ប្រទេសនេះមានគោលបំណងបង្កើនចំណែកនៃថាមពលកកើតឡើងវិញរបស់ខ្លួនដល់២០% នៅឆ្នាំ២០២៣ ដោយថាមពលពន្លឺព្រះអាទិត្យត្រូវបានគេរំពឹងថានឹងដើរតួនាទីយ៉ាងសំខាន់ក្នុងការសម្រេចបាននូវគោលដៅនេះ។ នៅឆ្នាំ ២០២០ កម្ពុជាបានសម្ពោធរោងចក្រថាមពលពន្លឺព្រះអាទិត្យដ៏ធំបំផុតរបស់ខ្លួន ដែលមានកម្លាំង ៦០ មេហ្គាវ៉ាត់ នៅក្នុងខេត្តកំពង់ឆ្នាំង ដែលរំពឹងថានឹងជួយកាត់បន្ថយការពឹងផ្អែករបស់ប្រទេសលើវារីអគ្គិសនី និងអគ្គិសនីនាំចូល។
សក្ដានុពលនៃថាមពលពន្លឺព្រះអាទិត្យនៅកម្ពុជាគឺមានវិសាលភាពធំធេងណាស់ ដោយសារទីតាំងភូមិសាស្រ្តអំណោយផលរបស់ប្រទេស និងពន្លឺថ្ងៃដ៏ច្រើនលើសលប់។ យោងតាមធនាគារអភិវឌ្ឍន៍អាស៊ី កម្ពុជាមានសក្តានុពលក្នុងការផលិតថាមពលពន្លឺព្រះអាទិត្យរហូតដល់ ១០,០០០ មេហ្គាវ៉ាត់ ដែលអាចរួមចំណែកយ៉ាងសំខាន់ក្នុងការបំពេញតម្រូវការថាមពលដែលកំពុងកើនឡើងរបស់ប្រទេស។ លើសពីនេះទៅទៀត តម្លៃថោកនៃថាមពលពន្លឺព្រះអាទិត្យបានទាក់ទាញការវិនិយោគ។ ធនាគារអភិវឌ្ឍន៍អាស៊ី បាននិងកំពុងគាំទ្រយ៉ាងសកម្មដល់កិច្ចខិតខំប្រឹងប្រែងរបស់កម្ពុជាក្នុងការលើកកម្ពស់ការប្រើប្រាស់ថាមពលពន្លឺព្រះអាទិត្យ រួមទាំងការផ្តល់ជំនួយបច្ចេកទេស និងហិរញ្ញប្បទានសម្រាប់គម្រោងថាមពលពន្លឺព្រះអាទិត្យផ្សេងៗក្នុងប្រទេស។
ក្រៅពីថាមពលពន្លឺព្រះអាទិត្យ កម្ពុជាក៏កំពុងស្វែងរកប្រភពថាមពលកកើតឡើងវិញផ្សេងទៀត ដូចជាខ្យល់ និងជីវម៉ាស។ តំបន់ឆ្នេរនៅភាគនិរតី ត្រូវបានគេកំណត់ថាមានសក្តានុពលសម្រាប់ការបង្កើតថាមពលខ្យល់។ ការសិក្សាថ្មីមួយរបស់កម្មវិធីអភិវឌ្ឍន៍របស់អង្គការសហប្រជាជាតិ បានរកឃើញថា ប្រទេសកម្ពុជាមានសក្តានុពលក្នុងការផលិតថាមពលខ្យល់រហូតដល់ ៥,០០០ មេហ្គាវ៉ាត់ ដែលអាចជួយកាត់បន្ថយការពឹងផ្អែកលើវារីអគ្គិសនី។
ថាមពលជីវម៉ាសដែលបានមកពីកាកសំណល់កសិកម្ម និងសារធាតុសរីរាង្គផ្សេងទៀត គឺជាការផ្តល់សង្ឃឹមមួយទៀតសម្រាប់ប្រទេសកម្ពុជាក្នុងការបង្កើតថាមពលករកើតឡើងវិញ។ វិស័យកសិកម្មបានផលិតកាកសំណល់យ៉ាងច្រើន ដែលអាចត្រូវបានបំប្លែងទៅជាថាមពលតាមរយៈការប្រើប្រាស់បច្ចេកវិទ្យាទំនើប។ អង្គការ UNDP បាននឹងកំពុងធ្វើការជាមួយរដ្ឋាភិបាលកម្ពុជា ដើម្បីបង្កើតគម្រោងថាមពលជីវម៉ាស ក្នុងគោលបំណងបង្កើតប្រភពថាមពលប្រកបដោយនិរន្តរភាព និងមិនបំផ្លាញបរិស្ថានក្នុងប្រទេស។
ខណៈដែលកម្ពុជាបន្តស្វែងរកប្រភពថាមពលកកើតឡើងវិញ ប្រទេសនេះក៏កំពុងផ្តោតលើការកែលម្អប្រសិទ្ធភាពថាមពល និងការលើកកម្ពស់ការអភិរក្សថាមពលផងដែរ។ រដ្ឋាភិបាលបានដាក់ចេញនូវគោលនយោបាយ និងគំនិតផ្តួចផ្តើមផ្សេងៗក្នុងគោលបំណងលើកទឹកចិត្តដល់អាជីវកម្ម និងប្រជាពលរដ្ឋឱ្យទទួលយកការអនុវត្ត និងបច្ចេកវិទ្យាសន្សំសំចៃថាមពល។ កិច្ចខិតខំប្រឹងប្រែងទាំងនេះត្រូវបានគេរំពឹងថានឹងដើរតួនាទីយ៉ាងសំខាន់ក្នុងការកាត់បន្ថយការប្រើប្រាស់ថាមពលទាំងមូលរបស់ប្រទេស និងធានានូវអនាគតថាមពលប្រកបដោយនិរន្តរភាព។
ទីផ្សារថាមពលរបស់កម្ពុជាបង្ហាញពីឱកាសសំខាន់ៗសម្រាប់ការអភិវឌ្ឍន៍ និងការទទួលយកប្រភពថាមពលកកើតឡើងវិញ។ តាមរយៈការធ្វើពិពិធកម្មថាមពលរបស់ខ្លួន ដោយទទួលយកថាមពលព្រះអាទិត្យ ខ្យល់ និងជីវម៉ាស កម្ពុជាអាចធានាបាននូវអនាគតថាមពលប្រកបដោយនិរន្តរភាព និងសុវត្ថិភាពសម្រាប់សេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់ខ្លួន។ ដោយមានការគាំទ្រពីអង្គការអន្តរជាតិ និងការបន្តវិនិយោគលើគម្រោងថាមពលកកើតឡើងវិញ កម្ពុជាកំពុងដើរលើផ្លូវឆ្ពោះទៅសម្រេចបាននូវគោលដៅថាមពលកកើតឡើងវិញប្រកបដោយមហិច្ឆិតារនិងក្លាយជាអ្នកដឹកនាំវិស័យថាមពលស្អាតក្នុងតំបន់។
