បំណុលពលរដ្ឋថៃជាង៤០០ពាន់លាន$ ជាក្ដីបារម្ភធំអាចបង្កហានិភ័យដល់ហិរញ្ញវត្ថុនិងសេដ្ឋកិច្ចថៃ

 ធនាគារកណ្ដាលរបស់ថៃបានកំណត់ថាបើកម្រិតបំណុលពលរដ្ឋថៃលើស៨០%នៃផលិតផលក្នុងស្រុកសរុបគឺអាចបង្កហានិភ័យដល់កំណើនសេដ្ឋកិច្ចរបស់ថៃរយៈពេលវែងនិងបង្កហានិភ័យដល់ស្ថិរភាពហិរញ្ញវត្ថុរបស់ថៃផងដែរ។ បើមើលមកស្ថានភាពសេដ្ឋកិច្ចបច្ចុប្បន្ន អត្រាអតិផរណានិងអត្រាការប្រាក់ ធនាគារកណ្ដាលថៃបានព្យាករថាប្រសិនបើគ្មានការអនុវត្តពីការរៀបចំឥណទានឡើងវិញទេនោះ កម្រិតបំណុលនឹងរក្សានៅ៨៤នៅត្រឹមឆ្នាំ២០២៧។

លោក Danucha Pichayanan រដ្ឋលេខាធិការនៃក្រុមប្រឹក្សាអភិវឌ្ឍនសង្គមនិងសេដ្ឋកិច្ចជាតិរបស់ថៃលោក Danucha បានសង្កត់ធ្ងន់ថាកម្រិតបំណុលពលរដ្ឋថៃអាចនឹងឈានដល់ចំណុលមួយដែលមានការព្រួយបារម្ភខ្លាំងដូច្នេះសម្រាប់រដ្ឋាភិបាលអាណត្តិបន្ទាប់ត្រូវតែត្រួតពិនិត្យឲ្យម៉ត់ចត់ហើយត្រូវដោះស្រាយបញ្ហានេះតាមរយៈការរៀបចំធ្វើឥណទានឡើងវិញនិងជំរុញចំណេះដឹងផ្នែកហិរញ្ញវត្ថុដល់ពលរដ្ឋថៃ។លោកបានបន្ថែមទៀតថាបញ្ហាបំណុលពលរដ្ឋថៃនេះមិនមែនប៉ះពាល់តែពលរដ្ឋនោះទេ ប៉ុន្ដែប៉ះពាល់ដល់សេដ្ឋកិច្ចជាតិទាំងមូលជាពិសេសនឹងកាត់បន្ថយតម្រូវការដែលជាកត្តាជំរុញសេដ្ឋកិច្ច។ លើសធ្វើឲ្យពលរដ្ឋជួបបញ្ហាហិរញ្ញវត្ថុធ្ងន់ធ្ងរទៀតផង។

គួរបញ្ជាក់ផងដែរថាបច្ចុប្បន្នបំណុលរបស់ប្រជាជនថៃកាន់តែកើនឡើងគឺកើតចេញពីការទិញអចលនទ្រព្យជាពិសេសទិញផ្ទះបង់រំលស់។ បើគិតត្រឹមត្រីមាសទី៤ឆ្នាំ២០២២កន្លងទៅបំណុលលើការទិញអចលនទ្រព្យរបស់ប្រជាជនថៃកើនឡើងចំនួន៥.២%៕