ភ្នំពេញៈ ផលិតផលម្រេចកម្ពុជារំពឹងនឹងអាចមានវត្តមាននៅទីផ្សារបណ្តាប្រទេសនៅតំបន់មជ្ឈិមបូព៌ានាពេលឆាប់ៗនេះ ខណៈរដ្ឋាភិបាលកម្ពុជា កាលពីដើមខែមិថុនានេះ បានចុះកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយជាមួយប្រទេសអេមីរ៉ាតអារ៉ាប់រួម ដែលជាប្រទេសស្ថិតក្នុងតំបន់មជ្ឈិមបូព៌ាផងដែរ។
ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែមិថុនា លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា (CPSF) បានឱ្យដឹងថា នៅពេលនេះសមាគមរបស់លោកកំពុងស្វែងរកទីផ្សារនាំចេញម្រេចទៅប្រទេសនៅតំបន់មជ្ឈិមបូព៌ាឱ្យបានឆាប់ ដើម្បីជំរុញការនាំចេញ និងអាចជួយឱ្យម្រេចទទួលបានតម្លៃប្រសើរជាងមុន។ បច្ចុប្បន្នដោយសារមិនសូវមានទីផ្សារនាំចេញផ្លូវការ ម្រេចកម្ពុជាប្រហែល ៨០ ភាគរយ ត្រូវបានឈ្មួញប្រមូលទិញយកទៅលក់ឱ្យប្រទេសវៀតណាម។
លោកបន្តថា នៅពេលមានទីផ្សារនាំចេញកាន់តែច្រើន នឹងធ្វើឱ្យអ្នកនាំចេញមានជម្រើសកាន់តែច្រើន ហើយតម្លៃក៏ខ្ពស់ដែរ។
លោកបញ្ជាក់ថា៖ «រហូតមកដល់ពេលនេះការនាំចេញម្រេចរបស់ក្រមហ៊ុនជាសមាជិក CPSF ទៅបណ្តាប្រទេសនៅតំបន់មជ្ឈិមបូព៌ា គឺមិនទាន់មានទេ ដោយបច្ចុប្បន្នយើងកំពុងធ្វើការជាមួយអ្នកបញ្ជាទិញនៅតំបន់នោះ ព្រោះការនាំចេញទៅទីនោះនឹងអាចមានរបាំងមួយចំនួន រួមទាំងនីតិវិធីបង់ពន្ធនាំចូល ជាដើម។ ទោះយ៉ាងណា យើងសង្ឃឹមថា ការនាំចេញទៅទីនោះនឹងចាប់ផ្តើមក្នុងពេលឆាប់ៗដើម្បីអាចប្រកួតប្រជែងជាមួយម្រេចមកពីប្រទេសផ្សេងៗ។
បើតាមលោក ណាក់ នី ផលិតផលម្រេចដែលកំពុងដាក់លក់នៅប្រទេសតំបន់មជ្ឈិមបូព៌ា គឺមានភាគច្រើននាំចូលពីប្រទេសវៀតណាម ឥណ្ឌូនេស៊ី និងប្រេស៊ីល ជាដើម។
ប្រធានសមាគមលើកកម្ពស់ម្រេចកំពត លោក ងួន ឡាយ បាននិយាយថា សម្រាប់ម្រេចកំពតដែលជាផលិតផលសម្គាល់ភូមិសាស្ត្រ គឺមិនមានក្តីបារម្ភពីបញ្ហាតម្លៃ និងទីផ្សារឡើយ ព្រោះផលដែលកសិករប្រមូលបានគឺមិនដែលសល់ទេ និងមានតម្លៃខ្ពស់ជាងម្រេចទូទៅទៀត។ ជាធម្មតា ការប្រមូលផលម្រេចកំពតក្នុង១ឆ្នាំ គឺមានបរិមាណក្នុងរង្វង់ប្រហែល ១០០ តោន។
លោកបានបញ្ជាក់ថា៖ «ម្រេចកំពត គឺតែងមានក្រុមហ៊ុននាំចេញមកបញ្ជាទិញស្ទើរអស់នៅមុនពេលប្រមូលផលម្តងៗ»។ បើតាមលោក ងួន ឡាយ ចាប់តាំងពីឆ្នាំ ២០១៥ មកតម្លៃម្រេចកំពត (GI) គឺមិនប្រែប្រួលឡើយ ដោយម្រេចខ្មៅ (នៅចម្ការ) មានតម្លៃមធ្យម ១៥ ដុល្លារក្នុង ១ គីឡូក្រាម, ម្រេចក្រហម ២៥ ដុល្លារ និងម្រេចស ២៨ ដុល្លារ។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម នឹងក្លាយជាកម្លាំងចលករ ជំរុញទំនាក់ទំនងកិច្ចសហ ប្រតិបត្តិការ ទូលំទូលាយ រវាងប្រទេសទាំង ២ ដែលនឹងជំរុញកំណើនសេដ្ឋកិច្ចជាតិ និងការអភិវឌ្ឍប្រកបដោយចីរភាព និងបរិយាប័ន្ន។ តាមរយៈកិច្ចព្រមព្រៀងនេះ កម្ពុជានឹងមានលទ្ធភាពក្នុងការធ្វើពិពិធកម្មទីផ្សារនាំចេញរបស់ខ្លួនទៅកាន់ប្រទេសអារ៉ាប់រួម និងអាចឈានទៅចាប់យកឱកាសទីផ្សារតំបន់មជ្ឈិមបូព៌ា និងតំបន់នៅក្បែរៗនោះផងដែរ។
ជាទូទៅកម្ពុជាអាចផលិតម្រេច (ធម្មតា) បានក្នុងរង្វង់ ១,៧ ទៅ ២ ម៉ឺនតោនក្នុង ១ ឆ្នាំ លើផ្ទៃដីដាំម្រេចសរុបជិត ៧ ០០០ ហិកតា តែបច្ចុប្បន្ននេះបានថយចុះប្រមាណពី ១០ ទៅ ២០ ភាគរយ។ លោកអះអាងថា ការដាំដុះម្រេចគឺភាគច្រើនសម្រាប់បំពេញតម្រូវការនាំចេញប៉ុណ្ណោះ ដោយសារការប្រើប្រាស់ម្រេចក្នុងស្រុកមានតិចតួចគឺប្រមាណ ៥-៧ ភាគរយប៉ុណ្ណោះក្នុង ១ ឆ្នាំ។ នេះបើតាមលោក ម៉ាក នី។
ទិន្នន័យក្រសួងកសិកម្ម ឱ្យដឹងថា ក្នុងត្រីមាសទី ១ ឆ្នាំ ២០២៣ ការនាំចេញម្រេចសម្រេចបាន ៨២២,៦៥ តោន ក្នុងនោះនាំចេញទៅប្រទេសវៀតណាមចំនួន ៧៦៥ តោន, អាមេរិក ២៦,១៤ តោន, កូរ៉េ ១៦,២ តោន, បារាំង ៩,៥៤ តោន, បែលហ្ស៊ិក ២,៣៦ តោន, ជប៉ុន ១,៣៨ តោន, ឥណ្ឌា ០,៩៦ តោន, អាល្លឺម៉ង់ ០,៩០ តោន, សិង្ហបុរី ០,១០ តោន, កោះតៃវ៉ាន់ ០,០៤ តោន, អូស្ត្រាលី ០,០៣ តោន និងប្រទេសម៉ាឡេស៊ី ០,០០២ តោន៕
