យោងតាមរបាយការណ៍របស់ប្រព័ន្ធផ្សព្វផ្សាយ និងអ្នកវិភាគបានឱ្យដឹងថា ប្រទេសកូរ៉េខាងជើងបានត្រៀមបិទស្ថានទូតជាច្រើនរួមទាំងនៅក្នុងប្រទេសអេស្ប៉ាញ ហុងកុង និងប្រទេសជាច្រើននៅក្នុងទ្វីបអាហ្រ្វិក នៅក្នុងសកម្មភាពមួយដែលអាចមើលឃើញជិត ២៥ ភាគរយនៃបេសកកម្មការទូតរបស់ទីក្រុងព្យុងយ៉ាងបិទនៅទូទាំងពិភពលោក ។
ក្រសួងបង្រួបបង្រួមកូរ៉េខាងត្បូងបាននិយាយកាលពីថ្ងៃអង្គារថា ការបិទបេសកកម្មការទូតរបស់កូរ៉េខាងជើងនាពេលថ្មីៗនេះ គឺជាសញ្ញាមួយបង្ហាញថា ប្រទេសឯកោនេះកំពុងតស៊ូដើម្បីរកប្រាក់នៅក្រៅប្រទេសដោយសារតែទណ្ឌកម្មអន្តរជាតិ ។
នៅថ្ងៃចន្ទ ប្រព័ន្ធផ្សព្វផ្សាយរដ្ឋកូរ៉េខាងជើង KCNA បាននិយាយថា ឯកអគ្គរដ្ឋទូតរបស់ប្រទេសនេះបានលាទៅកាន់មេដឹកនាំអង់ហ្គោឡា និងអ៊ូហ្គង់ដាកាលពីសប្តាហ៍មុន ហើយប្រព័ន្ធផ្សព្វផ្សាយក្នុងស្រុកនៅក្នុងប្រទេសអាហ្វ្រិកទាំងពីរបានរាយការណ៍ពីការបិទស្ថានទូតកូរ៉េខាងជើងនៅទីនោះ ។ ទាំងអង់ហ្គោឡា និងអ៊ូហ្គង់ដាបានពង្រឹងទំនាក់ទំនងមិត្តភាពជាមួយកូរ៉េខាងជើងតាំងពីទសវត្សរ៍ឆ្នាំ ១៩៧០ ដោយរក្សាកិច្ចសហប្រតិបត្តិការយោធា និងផ្តល់ប្រភពរូបិយប័ណ្ណបរទេសដ៏កម្រដល់កូរ៉េខាងជើង ។
ការបិទស្ថានទូតបានកំណត់ដំណាក់កាលសម្រាប់អ្វីដែលអាចជាការរង្គោះរង្គើគោលនយោបាយការបរទេសដ៏ធំបំផុតរបស់ប្រទេសក្នុងរយៈពេលជាច្រើនទសវត្សរ៍ដោយមានការប៉ះពាល់ចំពោះការចូលរួមការទូត ការងារមនុស្សធម៌នៅក្នុងប្រទេសឯកោ ក៏ដូចជាសមត្ថភាពក្នុងការបង្កើតប្រាក់ចំណូលខុសច្បាប់ផងដែរ។ ស្ថានទូតកូរ៉េខាងជើងជាង ១០ អាចនឹងត្រូវបិទ ដែលទំនងជាដោយសារតែទណ្ឌកម្មអន្តរជាតិ និន្នាការនៃការផ្តាច់ទំនាក់ទំនងរបស់ទីក្រុងព្យុងយ៉ាងនៅទូទាំងពិភពលោក និងការចុះខ្សោយដែលអាចកើតមាននៃសេដ្ឋកិច្ចកូរ៉េខាងជើង នេះបើតាមកាសែត NK News ដែលតាមដានកូរ៉េខាងជើងបានចុះផ្សាយ ។
ក្រសួងបង្រួបបង្រួមកូរ៉េរបស់ទីក្រុងសេអ៊ូល ដែលគ្រប់គ្រងកិច្ចការអន្តរកូរ៉េ បាននិយាយថា ការដកខ្លួននេះឆ្លុះបញ្ចាំងពីផលប៉ះពាល់នៃទណ្ឌកម្មអន្តរជាតិ ដែលមានបំណងទប់ស្កាត់ការផ្តល់មូលនិធិសម្រាប់កម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។
យោងតាមក្រសួងបង្រួបបង្រួមកូរ៉េបានឱ្យដឹងថា ប្រទេសកូរ៉េខាងជើងមានទំនាក់ទំនងផ្លូវការជាមួយប្រទេសចំនួន ១៥៩ ប៉ុន្តែមានស្ថានទូតចំនួន ៥៣ នៅក្រៅប្រទេស រួមទាំងស្ថានកុងស៊ុលចំនួន ៣ និងការិយាល័យតំណាងចំនួន ៣ របស់ប្រទេសនេះដែលដកខ្លួនចេញពីប្រទេសអង់ហ្គោឡា និងអ៊ូហ្គង់ដា ។
