មិនធម្មតា! គ្រូពេទ្យគន្ធបុប្ផា ជួយវះកាត់ទារកកើតមានអវៈយវៈមិនប្រក្រតី (ដៃ៤ ជើង៤) រហូតជោគជ័យ

(ភ្នំពេញ)៖ ផ្ទុះការស្ញប់ស្ញែង និងកោតសរសើរជាខ្លាំងចំពោះសមត្ថភាពក្រុមគ្រូពេទ្យនៅមន្ទីរពេទ្យគន្ធបុប្ផាបន្ទាប់ពីរួមគ្នាវះកាត់ទារកកើតមកមានអវៈយវៈមិនប្រក្រតីរហូតទទួលបានជោគជ័យ។

យោងតាមព័ត៌មានពីមន្ទីរពេទ្យបានឱ្យដឹងថា ទារកអាយុ ២ថ្ងៃ មកពីស្រុកសំពៅលូន ខេត្តបាត់ដំបង បានកើតដោយមានមកពីកំណើតនូវដៃ៤ ជើង៤ និងមានរន្ធគូទត្បៀតជិត (Anal imperforation)។ ទារកនេះ បានចូលសំរាកព្យាបាលនៅផ្នែកសង្គ្រោះទារក (NICU) ហើយត្រូវបានវះកាត់ដោយគ្រូពេទ្យឯកទេសវះកាត់ នៃមន្ទីរពេទ្យកុមារជ័យវរ្ម័នទី៧ (គន្ធបុប្ផា ទី៣) ដែលដឹកនាំវះកាត់ដោយលោកសាស្ត្រាចារ្យ កែវ សុខា លោកវេជ្ជបណ្ឌិតឯកទេស ប៉ុន ឡាឌីន និង លោកវេជ្ជបណ្ឌិតឯកទេស អៀន សារិន។

មន្ទីរពេទ្យ បានបញ្ជាក់ថា ទារករូបនេះ បានឆ្លងការវះកាត់៤លើក ដោយជោគជ័យ។ ការវះកាត់លើកទី១ គឺការវះកាត់យកអវៈយវៈលើ១គូរ(ដៃ)ចេញ។ ការវះកាត់លើកទី២គឺ ការវះកាត់ដោយចោះពោះវៀនធំដើម្បីអោយទារកបន្ទោបង់លាមកតាមចង្កេះ (colostomy)បណ្តោះអាសន្ន។ ការវះកាត់លើកទី៣គឺ ការវះកាត់យកអវៈយវៈក្រោម១គូរ(ជើង)ចេញ។ ការវះកាត់លើកទី៤គឺ ការវះកាត់យកឆ្អឹង pubis ដែលខូចទំរង់ពីកំណើតចេញ។

ក្រោយការព្យាបាលដោយវះកាត់ទាំង៤លើក ទារកមានសុខភាពល្អ មានការលូតលាស់និងធំធាត់ប្រក្រតី ដោយមានការជួយសង្គ្រោះដ៏ល្អនិងមានប្រសិទ្ធិភាពពីក្រុមវេជ្ជបណ្ឌិតឯកទេសផ្នែកសង្គ្រោះទារក (NICU)។

នៅព្រឹកថ្ងៃអង្គារ៍ ទី០៧ ខែវិច្ឆិកា ឆ្នាំ២០២៣ ទារករូបនេះ បានចេញទៅផ្ទះដោយស្នាមញញឹមជាមួយឪពុកម្តាយ ដោយមានការណាត់ជួបគ្រូពេទ្យវះកាត់ ៣ខែក្រោយ ដើម្បីបិទពោះវៀនវិញ និងជួសជុលរន្ធគូទ៕