(ភ្នំពេញ)៖ នៅព្រឹកថ្ងៃពុធ ៨កើត ខែមិគសិរ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី២០ ខែធ្នូ ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ អគារធនាគារវីងថៅវើ។
អគារធនាគារវីងថៅវើ ដែលជាសំណង់ស្ថាបត្យកម្មដ៏ល្អឯក និងជានិមិត្តរូបនៃភាពប៉ិនប្រសព្វក្នុងការច្នៃប្រឌិត បានដាក់សម្ពោធឱ្យប្រើប្រាស់ជាផ្លូវការ នៅចំកណ្តាលនៃរាជធានីភ្នំពេញ។ ជាមួយកម្ពស់រហូតដល់ ១២០ម៉ែត្រ ស្ថិតនៅតាមមហាវិថីមមាញឹកមួយ អគារធនាគារវីងថៅវើ គឺជាសក្ខីភាព ដែលបានបង្ហាញពីភាពរីកចម្រើននៃវិស័យធនាគារឌីជីថល នៅក្នុងប្រទេសកម្ពុជា។
ខាងក្រោមនេះជាប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត៖
*សម្តេចធិបតី ហ៊ុន ម៉ាណែត បានថ្លែងថា ធនាគារប្រៀបដូចជាបេះ ពោលមានសារៈសំខាន់ណាស់ សម្រាប់គាំទ្រដល់ដំណើរការសេដ្ឋកិច្ចជាតិ។
*សម្តេចធិបតី ហ៊ុន ម៉ាណែត ចូលរួមអបអរសាទរចំពោះការរីកចម្រើនរបស់ធនាគារវីង ហើយការរីកចម្រើននេះ បានចូលរួមសម្រួលប្រតិបត្តិការជាច្រើនផ្នែកហិរញ្ញវត្ថុរបស់ប្រជាពលរដ្ឋ។
*សម្តេចធិបតី ហ៊ុន ម៉ាណែត បានថ្លែងថា វត្តមានធនាគារវីង បានជួយគាំទ្រដល់ដំណើរការរាជរដ្ឋាភិបាលអេឡិចត្រូវនិករបស់កម្ពុជា លើការផ្តល់សេវានានារបស់រាជរដ្ឋាភិបាល។
*សម្តេចធិបតី ហ៊ុន ម៉ាណែត បានលើកទឹកចិត្តដល់ធនាគារទាំងអស់ពិនិត្យលទ្ធភាពផ្តល់សេវាកម្មឱ្យកាន់តែទូលំទូលាយ។
*សម្តេចធិបតី ហ៊ុន ម៉ាណែត លើកទឹកចិត្តធនាគារវីង និងធនាគារ ផ្តល់ឥណទានឱ្យបានកាន់តែច្រើន ដល់សហគ្រាសធុនតូច និងមធ្យម។
*សម្តេចធិបតី ហ៊ុន ម៉ាណែត លើកទឹកចិត្តដល់ធនាគារ និងគ្រឹះស្ថានហិរញ្ញវត្ថុទាំងអស់ ផ្តល់ឥណទានគាំទ្រវិស័យកសិកម្ម។
*សម្តេចធិបតី ហ៊ុន ម៉ាណែត បានថ្លែងថា និន្នាការរបស់ពិភពលោកនាពេលបច្ចុប្បន្នមិនមានកាន់លុយតាមខ្លួនទៀតនោះទេ។
*សម្តេចធិបតី ហ៊ុន ម៉ាណែត បានថ្លែងថា ធនាគារជាតិកម្ពុជា បានធ្វើទំនើបកម្មប្រព័ន្ធធនាគារច្រើនណាស់ ក្នុងនោះមានទូទាត់ផ្សេងៗដោយប្រើ QR Code ដែលធ្វើឱ្យការទូទាត់សេវាផ្សេងៗកាន់តែងាយស្រួល។
*សម្តេចធិបតី ហ៊ុន ម៉ាណែត បានថ្លែងថា ប្រព័ន្ធឌីជីថលងាយស្រួល តែការរក្សាប្រព័ន្ធសុវត្ថិភាព ក៏ត្រូវយកចិត្តទុកដាក់ឱ្យបានខ្ពស់។
*សម្តេចធិបតី ហ៊ុន ម៉ាណែត ក្រើនរំលឹកដល់ប្រព័ន្ធធនាគារយកចិត្តទុកដាក់ពង្រឹងប្រព័ន្ធសុវត្ថិភាព។
*សម្តេចធិបតី ហ៊ុន ម៉ាណែត បានថ្លែងថា ប្រព័ន្ធសេដ្ឋកិច្ចកម្ពុជាមិនអាចដើរបានឡើយ បើគ្មានលុយ។
*សម្តេចធិបតី ហ៊ុន ម៉ាណែត បានថ្លែងបង្ហាញអារម្មណ៍រីករាយ ចំពោះការរីកចម្រើនរបស់ធនាគារវីង និងធនាគារដទៃទៀតនៅកម្ពុជា។
*សម្តេចធិបតី ហ៊ុន ម៉ាណែត បានបង្ហាញក្តីរំពឹងថា នៅពេលកម្ពុជាទទួលបានអ្នកវិនិយោគ និងមានកំណើនពាណិជ្ជកម្ម ធនាគារនៅក្នុងស្រុកទាំងអស់នឹងពង្រឹងសមត្ថភាពចាប់យកឱកាសពីការវិនិយោគនានា។
*សម្តេចធិបតី ហ៊ុន ម៉ាណែត បានបញ្ចប់ការថ្លែងសុន្ទរកថាសំណេះសំណាលនៅវេលាម៉ោង ៨៖៤៨នាទី៕
