ភ្នំពេញៈ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានស្នើឱ្យប្រធានគណៈកម្មាធិការស្តីពីរបៀប និងមធ្យោបាយនៃសភាអាមេរិក ស្នើទៅសភាអាមេរិកដើម្បីពិចារណាពីការបន្តសុពលភាពប្រព័ន្ធអនុគ្រោះពន្ធទូទៅ (GSP) ឡើងវិញសម្រាប់កម្ពុជា ដែលជាវិធានការមួយ ដើម្បីរក្សាកិច្ចសហប្រតិបត្តិការសេដ្ឋកិច្ចក៏ដូចជាជំរុញការវិនិយោគរវាងប្រទេសទាំង ២។
ប្រព័ន្ធអនុគ្រោះពន្ធ (GSP) បានអស់សុពលភាពតាំងពីថ្ងៃទី ៣១ ខែធ្នូ ឆ្នាំ ២០២០ ហើយមិនទាន់ត្រូវបានបន្តឡើងវិញឡើយ ខណៈវិស័យឯកជនកំពុងរង់ចាំការសម្រេចចិត្តពីសភាអាមេរិក។
ការអំពាវនាវរបស់លោក ប៉ាន សូរស័ក្តិ បានធ្វើឡើងក្នុងជំនួបជាមួយលោក Jason Smith ប្រធានគណៈកម្មាធិការស្តីពីរបៀប និងមធ្យោបាយនៃសភាអាមេរិក ដែលដឹកនាំសមាជិកសភាអាមេរិកចំនួន ៧ រូបផ្សេងទៀត ជាមួយលោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា នៅថ្ងៃទី ២ ខែសីហា នៅទីស្តីការក្រសួង។
លោក សូរស័ក្តិ បានប្រាប់ទៅកាន់ប្រតិភូអាមេរិកអំពីដំណើរការបោះឆ្នោតជាតិដោយរលូន ដែលរៀបចំឡើងនៅកម្ពុជា នៅថ្ងៃទី ២៣ ខែកក្កដា និងពីវឌ្ឍនភាពនៃប្រទេសកម្ពុជា ក្នុងការពង្រីកទីផ្សារនាំចេញនៅឆ្នាំនេះរួមទាំងការអនុវត្តលើកិច្ចព្រមព្រៀងពាណិជ្ជកម្មសេរីក្នុងតំបន់ និងកិច្ចព្រមព្រៀងពាណិជ្ជកម្មសេរីទ្វេភាគី ព្រមទាំងការកែលម្អបរិយាកាសវិនិយោគ ដើម្បីទាក់ទាញការវិនិយោគកាន់តែច្រើន។
លោក សូរស័ក្តិ ត្រូវបានស្រង់សម្ដីដោយបានលើកឡើងថា៖ «យើងស្នើឱ្យសភាអាមេរិកបន្តសុពលភាពប្រព័ន្ធ GSP ឡើងវិញ ពិសេសសម្រាប់ទំនិញមួយចំនួន ដូចជាសម្លៀកបំពាក់ ស្បែកជើង និងទំនិញធ្វើដំណើរ ជាដើម ដោយសារតែការបន្តសុពលភាពប្រព័ន្ធ GSP ឡើងវិញនឹងពង្រឹងកិច្ចសហប្រតិបត្តិការពាណិជ្ជកម្មរវាងប្រទេសទាំង ២ និងផ្ដល់ផលចំណេញឱ្យគ្នាទៅវិញទៅមក»។
លោកក៏អំពាវនាវឱ្យក្រុមហ៊ុនអាមេរិកមកបណ្ដាក់ទុននៅកម្ពុជាឱ្យបានច្រើនបន្ថែមទៀត ដើម្បីកាត់បន្ថយឱនភាពពាណិជ្ជកម្មរវាងប្រទេសទាំង ២ ក៏ដូចជាដើម្បីទាញយកផលចំណេញពីគ្នាទៅវិញទៅមក។
រដ្ឋលេខាធិការក្រសួងពាណិជ្ជកម្ម លោក ប៉ែន សុវិជាតិ បានប្រាប់ ភ្នំពេញ ប៉ុស្តិ៍ កាលពីថ្ងៃទី ៣ ខែសីហាថា កម្ពុជាមិនមែនជាប្រទេសតែមួយគត់ដែលរង់ចាំការបន្តសុពលភាពនៃ GSP ឡើងវិញពីអាមេរិកនោះទេ ប៉ុន្តែបណ្ដាប្រទេសអភិវឌ្ឍន៍តិចតួចជាច្រើនផ្សេងៗទៀតផងដែរ។ លោកបន្តថា ការពន្យារពេលនៃការបន្តសុពលភាពឡើងវិញនេះ កម្ពុជាបានបង់ពន្ធជាទៀងទាត់លើការនាំចេញទំនិញធ្វើដំណើរទៅអាមេរិក។
លោកអះអាងថា៖ «ប្រទេសកម្ពុជា រួមជាមួយបណ្ដាប្រទេស LDCs ផ្សេងទៀតកំពុងជំរុញឱ្យសភាអាមេរិកពិចារណាការបន្តសុពលភាព GSP ឡើងវិញសម្រាប់ពួកយើង»។
កម្ពុជា និងអាមេរិកបានដោះដូរទំនិញដែលមានតម្លៃ ៨,៥១ ពាន់លានដុល្លារក្នុងរយៈពេល ១១ ខែនៃឆ្នាំ ២០២៣ កើនឡើង ២១,៧៩ ភាគរយ ធៀបនឹងរយៈពេលដូចគ្នាកាលពីឆ្នាំមុនជាមួយការនាំចេញរបស់កម្ពុជាទៅប្រទេសមានសេដ្ឋកិច្ចធំជាងគេក្នុងពិភពលោកមួយនេះ មានចំណែក ៩៦,៥៦ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
អំឡុងខែមករា ដល់ខែវិច្ឆិកាការនាំចេញរបស់កម្ពុជាមានតម្លៃ ៨,២១៨ ពាន់លានដុល្លារ កើនឡើង ២៣,០១ ភាគរយបើធៀបនឹងរយៈពេលដូចគ្នាកាលពីឆ្នាំ ២០២១ និងការនាំចូលមានតម្លៃ ២៩២,៧៩ លានដុល្លារ ធ្លាក់ចុះ ៤,៧៨ ភាគរយ។ អតិរេកពាណិជ្ជកម្មរបស់កម្ពុជាជាមួយអាមេរិកក្នុងរយៈពេល ១១ ខែ បានកើនឡើង ២៤,៣៥ ភាគរយពី ៦,៣៧ ពាន់លានដុល្លារដល់ ៧,៩២ ពាន់លានដុល្លារ។
អាមេរិកជាប្រទេសដែលទិញទំនិញពីប្រទេសកម្ពុជា ច្រើនជាងគេដែលបង្កើតចំណែកទីផ្សារ ៤០,១៧ ភាគរយ នៃទឹកប្រាក់សរុបចំនួន ២០,៤៥ ពាន់លានដុល្លារ ខណៈការនាំចេញរបស់អាមេរិកមកកម្ពុជា មានចំណែក ១,០៦ ភាគរយនៃទឹកប្រាក់សរុប ២៧,៧៤ ពាន់លានដុល្លារ៕
