បន្ទាប់ពីការប្រកាស តែងតាំងលោកស្រី Paetongtarn Shinawatra ជានាយករដ្ឋមន្ត្រីថៃ បានធ្វើឲ្យមានការភ្ញាក់ផ្អើល សម្រាប់អ្នកវិភាគនយោបាយមួយចំនួន ។
វាគូសបញ្ជាក់ថា នេះជាការចាប់ផ្ដើមឡើងវិញមួយ ក្រោយការខកខានកាន់តំណែងអស់រយៈពេល ១៨ ឆ្នាំ នៃវង្សត្រកូលស៊ីណាវ៉ាត្រា ពោលគឺបន្ទាប់ពីឪពុករបស់លោកស្រី, លោក ថាក់ស៊ីន ស៊ីណាវ៉ាត្រា ត្រូវបានបណ្តេញចេញពីតំណែងជានាយករដ្ឋមន្ត្រីនៅក្នុងរដ្ឋប្រហារយោធា ។
នៅថ្ងៃសុក្រនេះ លោកស្រី Paetongtarn ត្រូវបានសមាជិកសភាថៃបោះឆ្នោតជ្រើសរើសជានាយករដ្ឋមន្ត្រីថ្មី ។ លោកស្រីនឹងក្លាយជាមេដឹកនាំវ័យក្មេងបំផុតរបស់ប្រទេស ពោលគឺអាយុ ៣៧ ឆ្នាំ និងជានាយករដ្ឋមន្ត្រីទី ៣ នៃត្រកូលស៊ីណាវ៉ាត្រា បន្ទាប់ពីលោកឪពុក និងម្តាយមីងគឺលោកស្រី យីងឡាក់ ។
គណបក្សភឿថៃ បានទទួលការគាំទ្រពេញទំហឹង ដើម្បីតែងតាំងលោកស្រី សម្រាប់តំណែងកំពូលជំនួសលោក ស្រេតថាថាវីស៊ីន ដែលត្រូវបានបោះឆ្នោតទម្លក់ពីតំណែង កាលពីថ្ងៃពុធ បន្ទាប់ពីលោក តែងតាំងរដ្ឋមន្ត្រីខុទ្ទកាល័យដែលជាប់ពិរុទ្ធ ៕
