នាយករដ្ឋមន្ត្រីវៀតណាមលោក Pham Minh Chinh និយាយថា សេដ្ឋកិច្ចរបស់ទីក្រុងហូជីមិញបានបរាជ័យក្នុងការងើបឡើងវិញទាំងស្រុងពីជំងឺរាតត្បាត ហើយក៏បានប្រឈមមុខនឹងបញ្ហាថ្មីៗបន្ថែមទៀតផងដែរ ។
លោកនាយករដ្ឋមន្ត្រីបានឲ្យដឹងថា ទីក្រុងហូជីមិញ គឺជាក្បាលរថភ្លើងសេដ្ឋកិច្ចដ៏សំខាន់របស់វៀតណាម ដូចជា ផលិតផលតាមតំបន់ក្នុងស្រុកសរុប (GRDP) និងចំណូលថវិកាជាតិជាដើម ហើយប្រសិនបើទីក្រុងមួយនេះជួបការលំបាក ប្រទេសទាំងមូលក៏មានបញ្ហាដូចគ្នា ។
ទន្ទឹមនោះ ផលិតផលតាមតំបន់ក្នុងស្រុកសរុប (GRDP) របស់ទីក្រុងត្រូវបានប៉ាន់ប្រមាណថា មានចំនួន ៣៦០.៦២២ ពាន់ពាន់លានដុង ស្មើនឹង ១៥.២៨ ពាន់លានដុល្លារ នៅក្នុងត្រីមាសទីមួយនៃឆ្នាំនេះ ដោយកើនឡើង ០.៧ ភាគរយ ធៀបនឹងរយៈពេលដូចគ្នាកាលពីឆ្នាំមុន ។
កំណើននេះ គឺជាកម្រិតទាបបំផុតក្នុងរយៈពេល ៨ ឆ្នាំចុងក្រោយនេះ ដោយមិនរាប់បញ្ចូលរយៈពេលរោគរាតត្បាតកូវីដ ១៩ នោះទេ ។ មិនតែប៉ុណ្ណោះ ក្រុងហូជីមិញ ក៏មានកំណើនទាបបំផុតផងដែរ ក្នុងចំណោមទីក្រុងធំៗទាំង ៥ ។
ដោយឡែកចំពោះបញ្ហាកំណើនធ្លាក់ចុះនេះ ប្រធានគណៈកម្មាធិការប្រជាជនទីក្រុងហូជីមិញ លោក Phan Van Mai បាននិយាយថា គឺដោយសារតែទីផ្សារអចលនទ្រព្យ និងហិរញ្ញវត្ថុកំពុងប្រឈមមុខនឹងការលំបាកជាច្រើន ជាពិសេសក៏ដោយសារតែបំណុលអាក្រក់របស់ធនាគារ និងសម្ពាធកុងត្រាកាន់តែមាននិន្នាការកើនឡើង ។
តាមរយៈនេះ វិទ្យាស្ថានសិក្សាអភិវឌ្ឍន៍ទីក្រុងហូជីមិញក៏បានព្យាករណ៍ដែរថា សេដ្ឋកិច្ចរបស់ទីក្រុងនឹងបន្តប្រឈមបញ្ហាជាច្រើនទៀតនៅក្នុងត្រីមាសទី ២ នៃឆ្នាំនេះ នៅពេលដែលទីផ្សារអចលនទ្រព្យ ហិរញ្ញវត្ថុ និងទីផ្សារការងារបន្តជួបការលំបាក ហើយចំណែកសម្រាប់គោលដៅកំណើនដល់ ៨ ភាគរយ គឺមិនអាចទៅរួចនោះទេ ដោយសារតែទីក្រុងមិនបានកែតម្រូវទិសដៅកំណើនឡើយ ៕
