2020-07-06
បាល់ទាត់៖ Real Madrid បានបន្តដំណើរស្វែងរកជើងឯក La Liga របស់ខ្លួនជាបន្តទៀតក្រោយយកឈ្នះនៅទឹកដី Athletic Bilbao ១–០។ ប្រធានក្រុម Sergio Ramos គឺជាអ្នកស៊ុតបញ្ចូលទី ១គ្រាប់គត់អោយ Real Madrid យកឈ្នះ ១–០ ដែលជាគ្រាប់បាល់ពិន័យ ១១ម៉ែត្រ ហើយក៏ជាពីរប្រកួតជាប់គ្នាដែរ ដែលកីឡាករអេស្ប៉ាញស៊ុតគ្រាប់បាល់ជ័យជំនះដោយបាន ១១ម៉ែត្រ។
មិនត្រឹមតែប៉ុណ្ណោះ តំណែងជាខ្សែការពារទេ Sergio Ramos ស៊ុតបាន ៥គ្រាប់ហើយក្នុងចំណោម ៧ប្រកួតតាំងពីបាល់ទាត់ចាប់ផ្ដើមឡើងវិញ។ ចំណែកអ្នកចាំទី Thibaut Courtios ក៏បានក្លាយជាអ្នកចាំទីដំបូងរបស់ Real Madrid ដែលរក្សាទីមិនអោយគេទាត់ចូល ១៧ប្រកួតក្នុងមួយរដូវកាល La Liga ចាប់តាំងពីរដូវកាល ១៩៩៤–៩៥ ដែលធ្វើបានដោយ Francisco Buyo។ ក្រុមរបស់លោក Zinedine Zidane នៅពេលនេះត្រូវការឈ្នះ៣ ក្នុងចំណោម ៤ប្រកួតចុងក្រោយដើម្បីគ្រងជើងឯក La Liga រដូវកាលនេះ។
ងាកមកការប្រកួតរបស់ Barcelona បានធ្វើដំណើរទៅយក ៣ពិន្ទុពីទឹកដី Villarreal ៤–១ តែមិនមានគ្រាប់បាល់របស់ Lionel Messi ដែលលេចលឺថា ចង់ចាកចេញពី Barcelona ក្រោយការចរចាកិច្ចសន្យាថ្មីបរាជ័យ។ បួនគ្រាប់របស់ Barcelona បើកទំព័រដោយបាល់ចូលទីខ្លួនឯងរបស់ Pau Torres មុនពេល Gerard Moreno តាមស្មើវិញ។ ក្រោយ ៣គ្រាប់របស់ Barcelona ធ្វើបានដោយ Luis Suarez, Antoine Griezmann និង AnsuFati។ ជ័យជំនះនេះធ្វើអោយ Barcelona បន្តដេញតាម Real Madrid ៤ពិន្ទុដដែល ខណៈ Villarreal ស្គាល់បរាជ័យលើកដំបូងតាំងពី La Liga ចាប់ផ្ដើមឡើងវិញ ពោលគឺ ៦ប្រកួតមុន ឈ្នះ៥ និងស្មើ១៕
