(ភ្នំពេញ)៖ កាលពីថ្ងៃទី២ ខែឧសភា ឆ្នាំ២០២៤ កន្លងទៅនេះ រោងចក្រដំឡើងរថយន្ដ Toyota ដំបូងគេបង្អស់នៅក្នុងប្រទេសកម្ពុជា ដែលវិនិយោគដោយក្រុមហ៊ុន Toyota Tsusho MANUFACTURING (CAMBODIA) CO. LTD. មានទីតាំងនៅតំបន់សេដ្ឋកិច្ចពិសេស រ៉ូយ៉ាល់ បានសម្ពោធដាក់ឲ្យដំណើរការជាផ្លូវការហើយ។
នៅក្នុងកម្មពិធីសម្ពោធខាងលើបានប្រារព្ធឡើងដោយមានការអញ្ជើញចូលរួមពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោក Atsushi Ueno ឯកអគ្គរាជទូតជប៉ុន ព្រមទាំងភ្ញៀវកិត្ដិយសជាច្រើនរូបទៀត។
ក្នុងនោះដែរ លោក Ichiro Kashitani នាយកប្រតិបត្តិក្រុមហ៊ុន Toyota Tsusho បានលើកឡើងថា «ការចាប់ផ្តើមដំឡើង និងផ្គុំនេះ គឺជាព្រឹត្តិការណ៍ដ៏សំខាន់ថ្មីមួយក្នុងរយៈពេលជាង៣០ឆ្នាំ នៃប្រវត្តិសាស្ត្ររបស់ក្រុមហ៊ុន Toyota Tsusho ក្នុងប្រទេសកម្ពុជា។ ក្រុមហ៊ុន Toyota Tsusho នឹងប្តេជ្ញាបន្តជំរុញអាជីវកម្មរបស់ខ្លួននៅកម្ពុជា ក្នុងគោលបំណងរួមចំណែកធ្វើឲ្យប្រជាជនកម្ពុជាមានសុភមង្គល តាមរយៈការសម្រេចបាននូវអព្យាក្រឹតកាបូន និងការអភិវឌ្ឍន៍ធនធានមនុស្ស»។
លោកបន្ដថា «តាមរយៈការលើកកម្ពស់អាជីវកម្មដំឡើង និងផ្គុំរថយន្ត ក្រុមហ៊ុន Toyota Tsusho Group យើងខ្ញុំនឹងបន្តរួមចំណែកដល់ការអភិវឌ្ឍន៍សេដ្ឋកិច្ច និងសង្គមរបស់ប្រទេស តាមរយៈការអភិវឌ្ឍន៍ឧស្សាហកម្មចល័ត ដោយការចូលរួមឲ្យបានស៊ីជម្រៅក្នុងខ្សែសង្វាក់តម្លៃចល័ត ការបង្កើតការងារ និងការអភិវឌ្ឍន៍ធនធានមនុស្សនៅក្នុងប្រទេសកម្ពុជា ហើយជួយរួមចំណែក សេដ្ឋកិច្ចជាតិប្រទេស និងការអភិវឌ្ឍន៍សង្គម តាមរយៈឧស្សាហកម្មចល័តនេះ»។
សូមជម្រាបថា រោងចក្រដំឡើងរថយន្ដ Toyota នេះមានទុនវិនិយោគសរុបប្រមាណ ៣៦,៨ លានដុល្លាអាមេរិក និងមានបុគ្គលិកសរុបចំនួន ១៥០នាក់។ រោងចក្រនេះមានសមត្ថភាពដំឡើងរថយន្តពីរប្រភេទ បានចំនួន ១៣២០ គ្រឿង សម្រាប់ឆ្នាំ២០២៤ ក្នុងនោះ ទី១- ប្រភេទ SUV ម៉ាក Toyota Fortuner ចំនួន ២៩០ គ្រឿង និងទី២- ប្រភេទមួយបាំងកន្លះ (Pick-up truck) ម៉ាក Toyota Hilux ចំនួន ១.០៣០ គ្រឿងផងដែរ៕
