ក្រុមហ៊ុនផលិតរថយន្តអគ្គិសនីប្រណិត (EV) របស់សហរដ្ឋអាមេរិក Lucid Group (LCID.O) កំពុងរៀបចំខ្លួនចូលក្នុងទីផ្សាររថយន្តដ៏ធំបំផុតរបស់ពិភពលោក គឺប្រទេសចិន។ នេះបើតាមការបញ្ជាក់របស់លោក Zhu Jiang ប្រធានប្រតិបត្តិការរបស់ប្រទេសចិន។
តាមការចុះផ្សាយដោយរ៉យទ័រ ក្រុមហ៊ុនរថយន្ត Lucid នឹងលក់រថយន្តដែលនាំទៅក្នុងប្រទេសចិន ហើយថែមទាំងកំពុងពិចារណាលើការផលិតក្នុងស្រុកក្នុងប្រទេសនេះផងដែរ។ លោក Zhu បានបញ្ជាក់ប្រាប់ថា ក្រុមហ៊ុនកំពុងរៀបចំខ្លួនចូលទៅក្នុងទីផ្សារប្រទេសចិនពិតមែន តែមិនទាន់ដឹងពីទំហំនៃផលិតកម្មនោះទេ។ លោកថា “ការផ្តល់មូលនិធិនឹងជួយ Lucid នាំយកបច្ចេកវិទ្យា EV កម្រិតខ្ពស់ និងបទពិសោធន៍ផលិតផលទៅកាន់ឧស្សាហកម្ម និងអ្នកប្រើប្រាស់ទូទាំងពិភពលោកក្នុងល្បឿនលឿនជាងមុន”។ លោកបានបន្តថា៖ “ប្រទេសចិនក៏កំពុងទន្ទឹងរង់ចាំវាដែរ”។
Lucid កាលពីសប្តាហ៍មុនបាននិយាយថាខ្លួនគ្រោងនឹងរៃអង្គាសប្រាក់បានប្រហែល ៣ ពាន់លានដុល្លារតាមរយៈការផ្តល់ជូនភាគហ៊ុន ដែលស្មើជិតពីរភាគបីនឹងមកពីមូលនិធិវិនិយោគសាធារណៈរបស់អារ៉ាប៊ីសាអូឌីត (PIF)៕
