របបយោធាមីយ៉ាន់ម៉ា បានប្រកាសរំលាយគណបក្ស NLD របស់លោកស្រី អ៊ុងសាន ស៊ូជី ដោយមូលហេតុបរាជ័យក្នុងការចុះឈ្មោះឡើងវិញក្រោមច្បាប់បោះឆ្នោតថ្មី។ នេះដោយតាមការចុះផ្សាយដោយទូរទស្សន៍ Myawaddy TV បាននិយាយនៅក្នុងព្រឹត្តិបត្រមួយកាលពីល្ងាចថ្ងៃអង្គារទី ២៨ ទី មីនាឆ្នាំ២០២៣។
សេចក្តីរាយការណ៍និយាយថា គណបក្សសម្ព័ន្ធជាតិដើម្បីប្រជាធិបតេយ្យហៅកាត់ (NLD) ដែលជាគណបក្សនយោបាយមួយក្នុងចំណោមគណបក្សចំនួន ៤០ បានខកខានមិនបានបំពេញតាមកាលបរិច្ឆេទនៃការចុះឈ្មោះរបស់របបយោធាដែលកំពុងកាន់អំណាចសម្រាប់ការបោះឆ្នោតថ្មីរបស់ប្រទេសនោះទេ។ រដ្ឋាភិបាលយោធាកាន់អំណាចនឹងត្រូវរំលាយគណបក្សនេះចោល។
ការរំលាយបក្សនយោបាយរបស់លោកស្រីស៊ូជីដែលកំពុងជាប់ឃុំនេះ បានកើតឡើងបន្ទាប់ពីកាលពីខែមករា ក្រុមយោធាបានផ្តល់ពេលពីរខែដល់គណបក្សនយោបាយទាំងនេះដើម្បីចុះឈ្មោះឡើងវិញ ក្រោមច្បាប់បោះឆ្នោតថ្មីដ៏តឹងរឹងមួយ មុនពេលការបោះឆ្នោតថ្មីដែលខ្លួនបានសន្យាថានឹងរៀបចំធ្វើឡើងវិញ ប៉ុន្តែដៃគូប្រជែងរួមទាំង(NLD) បាននិយាយថាខ្លួននឹងចូលរួមដោយគ្នានសិទ្ធិសេរីភាព ឬយុត្តិធម៌ឡើយ។ នៅថ្ងៃអង្គារដដែលនោះ លោក Bo Bo Oo សមាជិកសភាជាប់ឆ្នោតម្នាក់មកពីគណបក្សរបស់លោកស្រីស៊ូជីបានថ្លែងថា៖ “យើងមិនទទួលយកជាដាច់ខាតចំពោះការបោះឆ្នោតដែលនឹងត្រូវធ្វើឡើងនៅពេលដែលមេដឹកនាំនយោបាយ និងសកម្មជននយោបាយជាច្រើនត្រូវបានចាប់ខ្លួន ហើយប្រជាជនត្រូវបានយោធាធ្វើទារុណកម្មយ៉ាងវេទនា”។ សូមរំលឹកថា នៅក្នុងខែវិច្ឆិកា ឆ្នាំ ២០២០ គណបក្ស NLD បានទទួលជ័យជម្នះភ្លូកទឹកភ្លូកដីនៅក្នុងការបោះឆ្នោតសភារបស់ប្រទេស។ ប៉ុន្តែមិនដល់៣ខែក្រោយមក កងទ័ពបានធ្វើរដ្ឋប្រហារ និងចាប់ឃុំខ្លួនលោកស្រី អ៊ុងសាន ស៊ូជី ចោទពីបទក្លែងបន្លំសន្លឹកឆ្នោត។ យោងតាមក្រុមឃ្លាំមើលក្នុងតំបន់បានឱ្យដឹងថា មនុស្សជាង ៣១០០ នាក់ត្រូវបានសម្លាប់ និងជាង ២០០០០ នាក់ត្រូវបានចាប់ខ្លួនចាប់តាំងពីរដ្ឋប្រហារ៕
ប្រភព៖ ALJAZEERA
