ភ្នំពេញៈ អគ្គនាយកក្រុមហ៊ុន RMA (Cambodia) Plc (RMAC) ដែលជាក្រុមហ៊ុនចែកចាយផ្តាច់មុខរថយន្ត Ford នៅកម្ពុជា ហើយបច្ចុប្បន្នមានរោងចក្រដំឡើងរថយន្ត Ford នៅក្នុងខេត្តពោធិ៍សាត់ កំពុងដាក់ផែនការប្រែក្លាយរោងចក្រនាពេលបច្ចុប្បន្នឱ្យទៅជារោងចក្រផលិតនាពេលអនាគត។
ថ្លែងក្នុងពិធីគម្រប់ខួប ១ ឆ្នាំនៃក្រុមហ៊ុន RMA Automotive Cambodia (RMAC) Ford Assembly Plant នៅថ្ងៃទី ១១ ខែកក្កដា ឆ្នាំ ២០២៣ នៅស្រុកក្រគរ ខេត្តពោធិ៍សាត់ លោក ង៉ន សាំង អគ្គនាយកក្រុមហ៊ុន RMAC បានឱ្យដឹងថា បន្ទាប់ពីបើកដំណើរការបានរយៈពេល ១ ឆ្នាំ ក្រុមហ៊ុនបានដំឡើងរថយន្តផ្ដាច់មុខប្រភេទ Ranger និង Everest ជំនាន់ក្រោយប្រមាណ ៣ ០០០ គ្រឿងសម្រាប់ទីផ្សារកម្ពុជាដែលជួយឱ្យរថយន្ត Ford រក្សាបានតួនាទីនាំមុខគេនៅប្រទេសកម្ពុជា។
លោកបន្តថា ការវិនិយោគលើរោងចក្រដំឡើងរថយន្តរបស់ក្រុមហ៊ុន Ford ក្នុងខេត្តពោធិ៍សាត់ តំណាងឱ្យការវិនិយោគធំមួយនៅកម្ពុជា និងបានផ្លាស់ប្តូរខេត្តដែលពឹងផ្អែកចម្បងលើវិស័យកសិកម្មទៅជាឧស្សាហកម្មមួយដែលមានសក្តានុពល។
លោកថ្លែងថា៖ «រហូតមកដល់ពេលនេះ យើងបានដំឡើងរថយន្ត Ford Ranger Wildtrak និង Ford Everest បាន ៣ ០០០ គ្រឿងដើម្បីផ្គត់ផ្គង់តម្រូវការទីផ្សារក្នុងស្រុក។ វត្តមានរបស់រោងចក្រដំឡើងរថយន្ត Ford គឺជាការចាប់ផ្តើមនៃវិស័យផលិតយានយន្តពីកម្រិតដំឡើងទៅកម្រិតផលិត ដើម្បីជួយឱ្យកម្ពុជាផ្លាស់ប្តូរមុខមាត់ថ្មីពីប្រទេសដែលដំឡើងរថយន្តទៅជាប្រទេសផលិតរថយន្តនាពេលអនាគតដ៏ខ្លីខាងមុខ»។
លោកបានបន្តថា រោងចក្រដំឡើងរថយន្ត Ford ក៏ចូលរួមចំណែកលើកកម្ពស់ឧស្សាហកម្មរថយន្តនៅកម្ពុជា តាមរយៈការនាំចូលបច្ចេកវិទ្យាដំឡើងរថយន្តថ្មី ពិសេសបច្ចេកវិទ្យារថយន្ត Ford ស្របតាមស្តង់ដាអន្តរជាតិ។
ក្រុមហ៊ុន RMAC កាលពីថ្ងៃទី ១៦ ខែមិថុនា ឆ្នាំ ២០២២ បានសម្ពោធរោងចក្រដំឡើងរថយន្ត Ford ដំបូងបង្អស់របស់ព្រះរាជាណាចក្រកម្ពុជា ដែលមានតម្លៃ ២១ លានដុល្លារ នៅស្រុកក្រគរ ខេត្តពោធិ៍សាត់។
លោក កែវ រតនៈ អគ្គនាយកអគ្គិសនីកម្ពុជា បានឱ្យដឹងនៅក្នុងសេចក្តីប្រកាសព័ត៌មានថា ក្រុមហ៊ុនផលិតរថយន្តអាមេរិកនេះ គ្រោងនឹងបង្កើនការវិនិយោគរបស់ខ្លួន និងដំឡើងរថយន្តម៉ូដែល Ford Territory។ បច្ចុប្បន្នក្រុមហ៊ុន RMAC បានដាក់បញ្ចូលគ្នានូវការដំឡើងរថយន្តប្រភេទ Ranger SUV និងរថយន្តភីកអាប់ Everest។ មិនមានការកំណត់ពេលវេលាសម្រាប់ការរៀបចំខ្សែចង្វាក់ដំឡើងរថយន្តរបស់ក្រុមហ៊ុន Ford Territory ណាមួយនៅឡើយទេ។
លោក Kay Hart អគ្គនាយកក្រុមហ៊ុន Ford International Markets Group (IMG) បានថ្លែងក្នុងខួប ១ ឆ្នាំថា បន្ទាប់ពីក្រុមហ៊ុននេះចាប់ផ្តើមដំណើរការអស់រយៈពេលមួយឆ្នាំមករោងចក្រនេះបានផ្ដល់ការងារដល់បុគ្គលិករាប់រយនាក់ មកពីស្ថាប័នបច្ចេកទេសក្នុងស្រុក បានផ្តល់កម្មវិធីបណ្តុះបណ្តាលជំនាញយ៉ាងទូលំទូលាយដល់កម្លាំងពលកម្មក្នុងស្រុក។
លោកថ្លែងថា៖ «រោងចក្រនេះបានដំឡើងរថយន្ត Ranger និង Everest ជំនាន់ក្រោយជាង ៣ ០០០ គ្រឿងរួចជាស្រេចសម្រាប់ទីផ្សារកម្ពុជា ដែលជួយឱ្យរថយន្តយីហោ Ford រក្សាបានតំណែងជាក្រុមហ៊ុននាំមុខគេនៅកម្ពុជា។ ថ្ងៃនេះ ក្រុមហ៊ុន RMA Group បន្តការប្ដេជ្ញាចិត្តរបស់ខ្លួនក្នុងការលើកកម្ពស់ជីវភាពប្រជាជនកម្ពុជា»។
ក្នុងឯកសាររបស់ក្រុមហ៊ុន RMAC ដែលផ្ញើទៅទីផ្សារមូលបត្រកម្ពុជាកន្លងមក ក្រុមហ៊ុន RMAC បានកត់សម្គាល់ថា៖ «ទីផ្សាររថយន្តនៅកម្ពុជាក្នុងឆ្នាំ ២០២២ បានកើនឡើង ២៦ ភាគរយធៀបឆ្នាំមុនក្នុងចំនួនប្រហែល ៧១ ០០០ គ្រឿងទាំងរថយន្តថ្មី និងរថយន្តប្រើរួច ដែលបានលក់ និងចុះបញ្ជីធៀបនឹងចំនួន ៥៧ ០០០ គ្រឿងកាលពីឆ្នាំ ២០២១»៕
