(សិង្ហបុរី)៖ ក្រុមហ៊ុន Shell បានឱ្យដឹងនៅថ្ងៃពុធថា ខ្លួនបានយល់ព្រមលក់រោងចក្រចម្រាញ់ប្រេង និងទ្រព្យសកម្មគីមីឥន្ធនៈរបស់ខ្លួននៅក្នុងប្រទេសសិង្ហបុរី ដែលជាមជ្ឈមណ្ឌលប្រេងដ៏សំខាន់របស់អាស៊ីទៅឱ្យក្រុមហ៊ុនបណ្តាក់ទុនរួមគ្នាមួយរវាងក្រុមហ៊ុនគីមីឥណ្ឌូណេស៊ី Chandra Asri និងក្រុមហ៊ុនរុករករ៉ែនិងពាណិជ្ជកម្មទំនិញ Glencore របស់ប្រទេសស្វ៊ីស។ នេះបើយោងតាមកាសែត Channel News Asia។
ទីភ្នាក់ងារព័ត៌មានរ៉យទ័របានរាយការណ៍កាលពីខែសីហាឆ្នាំមុនថា ក្រុមហ៊ុន Shell បានជួលក្រុមហ៊ុន Goldman Sachs ដើម្បីសិក្សាពីលទ្ធភាពលក់រោងចក្រចម្រាញ់ប្រេង និងគីមីឥន្ធនៈរបស់ខ្លួននៅក្នុងប្រទេសសិង្ហបុរី ដែលជាផ្នែកមួយនៃការពិនិត្យមើលឡើងវិញជាយុទ្ធសាស្រ្តទូលំទូលាយទូទាំងពិភពលោកដើម្បីក្លាយជាប្រតិបត្តិករដែលមានឧស្ម័នកាបូនិកទាប។
កាកាសែត Channel News Asia បានរាយការណ៍ថា រលក់នេះគឺជាផ្នែកមួយនៃផែនការរបស់លោក Wael Sawan នាយកប្រតិបត្តិក្រុមហ៊ុន Shell ដើម្បីកាត់បន្ថយឧស្ម័នកាបូនិករបស់ក្រុមហ៊ុន និងផ្តោតប្រតិបត្តិការរបស់ខ្លួនលើអាជីវកម្មដែលទទួលបានប្រាក់ចំណេញច្រើនបំផុត។
ក្រុមហ៊ុន Shell បានឱ្យដឹងនៅក្នុងសេចក្តីប្រកាសព័ត៌មានមួយថា ប្រតិបត្តិការនេះនឹងផ្ទេរអត្ថប្រយោជន៍ទាំងអស់របស់ក្រុមហ៊ុន Shell នៅក្នុងក្រុមហ៊ុន Shell Energy and Chemicals Park Singapore e ទៅកាន់ក្រុមហ៊ុន CAPGC ដែលជាក្រុមហ៊ុនបណ្តាក់ទុនរួមគ្នារបស់ឥណ្ឌូណេស៊ីនិងប្រទេសស្វ៊ីសនេះ។
ក្រុមហ៊ុនបានបន្ថែមថា៖ «បុគ្គលិកនៅក្នុងក្រុមហ៊ុន Shell Energy and Chemicals Park Singapore នឹងបន្តធ្វើការងាររបស់ពួកគេជាមួយក្រុមហ៊ុន CAPGC ស្ថិតក្រោមកម្មសិទ្ធិថ្មីនេះ ដោយផ្តល់ការបន្តការងារសម្រាប់បុគ្គលិក និងការរួមចំណែកដល់ភាពជឿជាក់ និងសុវត្ថិភាពនៃប្រតិបត្តិការដែលកំពុងបន្ត»។
យោងតាមកាសែត Channel News Asai ក្រុមហ៊ុន Shell មិនបានបង្ហាញតម្លៃទិញលក់នេះទេ។ ក្រុមហ៊ុន Shell បានបន្ថែមថា កិច្ចព្រមព្រៀងដែលត្រូវទទួលបានការអនុម័តផ្នែកបទប្បញ្ញត្តិនេះរំពឹងថានឹងបញ្ចប់នៅចុងឆ្នាំ២០២៤៕
