ក្រុមហ៊ុនផលិតរថយន្តអគ្គិសនីរបស់សហរដ្ឋអាមេរិក Tesla (TSLA.O) កំពុងពិភាក្សាជាមួយមេដឹកនាំនៃរដ្ឋាភិបាលក្នុងតំបន់ Valencia ក្នុងប្រទេសអេស្ប៉ាញ ដើម្បីធ្វើការវិនិយោគលើរោចក្រផលិតរថយន្ត។ នេះបើតាមប្រភពជិតស្និទ្ធនឹងការពិភាក្សាបានប្រាប់បណ្តាញសារព័ត៌មាន រ៉យទ័រ។
អ្នកនាំពាក្យរបស់រដ្ឋាភិបាលក្នុងតំបន់របស់ Valencia បានប្រាប់រ៉យទ័រថា ខ្លួនបានរៀបចំកិច្ចប្រជុំ និងការសន្ទនាជាមួយក្រុមហ៊ុនមិនស្គាល់អត្តសញ្ញាណមួយអំពី “ការវិនិយោគលើរថយន្តដ៏ធំ” ប៉ុន្តែបានបដិសេធមិនផ្តល់ព័ត៌មានលម្អិតបន្ថែម ដោយលើកឡើងពីភាពសម្ងាត់នៃការចរចា។ ប្រភពដាច់ដោយឡែកមួយបានបញ្ជាក់ថាក្រុមហ៊ុនដែលពាក់ព័ន្ធគឺ Tesla ។ កាសែតពាណិជ្ជកម្មអេស្ប៉ាញ Cinco Dias បានដកស្រង់ប្រភពនេះដោយនិយាយថា ការវិនិយោគនេះនឹងក្លាយជារោងចក្រផលិតរថយន្ត ហើយទំហំសរុបរបស់វាអាចឈានដល់ ៤.៥ ពាន់លានអឺរ៉ូ (៤.៨៣ ពាន់លានដុល្លារ)។
អេស្បាញគឺជាប្រទេសផលិតរថយន្តធំទីពីររបស់អឺរ៉ុប ហើយកំពុងប្រើប្រាស់មូលនិធិសង្គ្រោះជំងឺរាតត្បាតកូវីដរបស់សហភាពអឺរ៉ុប ដើម្បីទាក់ទាញក្រុមហ៊ុនផលិតរថយន្តឱ្យវិនិយោគលើការផលិតទាំងអាគុយ និងរថយន្តអគ្គិសនី។ នាពេលបច្ចុប្បន្ននេះ ក្រុមហ៊ុន Tesla មានរោងចក្រផលិតរថយន្តអឺរ៉ុបតែមួយគត់ ដែលមានសារៈសំខាន់ចំពោះមហិច្ឆតារបស់នាយកប្រតិបត្តិ Tesla លោក Elon Musk ក្នុងការដណ្តើមយកមេដឹកនាំទីផ្សារអឺរ៉ុប Volkswagen (VOWG_p.DE) - គឺស្ថិតនៅក្នុងរដ្ឋ Brandenburg ប្រទេសអាល្លឺម៉ង់។
ក្រុមហ៊ុននេះបាននិយាយថា វាត្រូវបានសាងសង់កាលពីឆ្នាំមុន ហើយដល់ខែកុម្ភៈឆ្នាំនេះ គឺអាចផលិតរថយន្តបាន ៤០០០គ្រឿងក្នុងមួយសប្តាហ៍។ លោក Musk បាននិយាយកាលពីខែឧសភាថា ក្រុមហ៊ុនផលិតរថយន្តប្រហែលជានឹងជ្រើសរើសទីតាំងសម្រាប់រោងចក្រថ្មីមួយនៅចុងឆ្នាំនេះ ដោយមិនត្រូវបានគូសនៅទីណានោះទេ៕
