ក្រុមហ៊ុន Toyota Motor បានសាងកំណត់ត្រាថ្មីជាប្រវត្តិសាស្ត្រសម្រាប់ប្រទេសជប៉ុន នៅពេលមូលធនទីផ្សារ (Market Cap) របស់ក្រុមហ៊ុនផលិតរថយន្តមួយនេះបានកើនឡើងរហូតដល់ប្រមាណ៣៣០ពាន់លានដុល្លារអាម៉េរិក គិតត្រឹមថ្ងៃជួញដូរកាលពីថ្ងៃអង្គារ ទី២៣ ខែមករា នៅតូក្យូ។
យោងតាមទិន្នន័យរបស់សារព័ត៌មាន Nikkei បង្ហាញថា អ្នកគ្រងកំណត់ត្រាចាស់គឺក្រុមហ៊ុនទូរគមនាគមន៍ខ្នាតយក្សរបស់ជប៉ុន NTT ដែលមានមូលធនទីផ្សារប្រមាណ៣២៩ពាន់លានដុល្លារអាម៉េរិក។ក្រុមហ៊ុនទូរគមនាគមន៍ខ្នាតយក្សរបស់ជប៉ុន NTT បានសាងកំណត់ត្រាចាស់របស់ខ្លួនក្នុងឆ្នាំ១៩៨៧ ខណៈដែលកាលនោះមូលធនទីផ្សាររបស់ក្រុមហ៊ុន Toyota មានត្រឹមប្រមាណ២៧ពាន់លានដុល្លារអាម៉េរិក ប៉ុណ្ណោះ។
តម្លៃភាគហ៊ុនរបស់ក្រុមហ៊ុន Toyota បានកើនឡើង១៥%គិតត្រឹមដើមឆ្នាំ២០២៤ នេះ។ សម្ទុះប្រាក់ចំណូលរបស់ក្រុមហ៊ុនរថយន្ត Toyota កំពុងទទួលការសរសើរពីវិនិយោគិនជាច្រើន ហើយក្រុមហ៊ុនផលិតរថយន្តមួយនេះរំពឹងថា ប្រាក់ចំណេញប្រតិបត្តិការ (Operating Profit) របស់ខ្លួននឹងកើនឡើង៦៥%ឈានដល់៣០ពាន់លានដុល្លារអាម៉េរិក ក្នុងឆ្នាំសារពើពន្ធ២០២៤។
កត្តាដែលជំរុញឱ្យប្រាក់ចំណូលរបស់ក្រុមហ៊ុននេះកើនឡើង គឺដោយសារតែការឡើងថ្លៃ ការបង្កើនផលិតកម្ម និងការធ្លាក់ថ្លៃនៃប្រាក់យ៉េន ព្រមទាំងកត្តារួមផ្សំមួយចំនួនផងដែរ៕
