(វ៉ាស៊ីនតោន)៖ រដ្ឋបាលសុវត្ថិភាពចរាចរណ៍ផ្លូវហាយវេជាតិ (NHTSA) របស់សហរដ្ឋអាមេរិក បានឱ្យដឹងនៅថ្ងៃអង្គារថា ក្រុមហ៊ុន Toyota នឹងប្រមូលរថយន្តប្រភេទ SUV និងរថយន្ត Pickup ជាង ១សែនគ្រឿងនៅសហរដ្ឋអាមេរិក ដើម្បីជួសជុលបញ្ហាកម្ទេចនៅក្នុងម៉ាស៊ីន ដែលអាចបណ្តាលឱ្យម៉ាស៊ីនជាប់គាំង។ នេះបើយោងតាមទីភ្នាក់ងារព័ត៌មានរ៉យទ័រ។
រថយន្តដែលប្រមូលមកជួសជុលវិញនេះ រួមមានរថយន្តភីកអាប់ Toyota Tundra និងរថយន្ត Lexus LX600 SUV ដែលបំពាក់ដោយម៉ាស៊ីន V35A ប្រាំមួយស៊ីឡាំង។
រដ្ឋបាល NHTSA បានឱ្យដឹងថា កម្ទេចសេសសល់ពីដំណើរការផលិតអាចប៉ះពាល់ម៉ាស៊ីន និងបណ្តាលឱ្យពិដាងសំខាន់ៗ មិនដំណើរការដែលអាចបណ្តាលឱ្យម៉ាស៊ីនឈប់ដំណើរការ និងបើកបរលែងទៅមុខ។ រដ្ឋបាល NHTSA បានបន្ថែមថា ដំណោះស្រាយកំពុងធ្វើឡើង ដើម្បីកែប្រែស្ថានភាពនេះ។ នេះបើយោងតាមទីភ្នាក់ងារព័ត៌មានរ៉យទ័រ៕
