(ភ្នំពេញ)៖ កញ្ញា អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ចាប់ពីខែមករា ដល់មិថុនា ឆ្នាំ២០២៣ នេះ ការនាំចេញគ្រាប់ស្វាយចន្ទីទៅក្រៅប្រទេស សម្រេចបានក្នុងបរិមាណ ជាង ៣៦៣ ១៧៣តោន ដែលអត្រានេះ មានការថយចុះ១២,៦៧ភាគរយ បើធៀបនឹងរយៈពេលដូចគ្នា ក្នុងឆ្នាំ២០២២។
កញ្ញា អ៊ឹម រចនា បានលើកឡើងថា ចំពោះការនាំចេញគ្រាប់ស្វាយចន្ទីថយចុះ ក្នុងឆមាសទី១ ឆ្នាំនេះ ដោយសារស្ថានភាពមិនច្បាស់លាស់ខាងទីផ្សារ និងបញ្ហាបម្រែបម្រួលអាកាសធាតុនាំឱ្យប៉ះពាល់ដល់ទិន្នផល ខណៈការនាំចេញនៅក្នុងខែមិថុនា សម្រេចបានក្នុងបរិមាណជាង ២៨ ១៩០តោន។
កញ្ញា អ៊ឹម រចនា បន្ថែមថា ៖ «មូលហេតុនៃការថយចុះនេះ ក៏បណ្តាលមកពីកត្តា ១ទៀតដែរ គឺបញ្ហាគុណភាពនៃដំណាំ ហើយការនាំចេញដោយគ្មានការស្នើសុំវិញ្ញាបនបត្រភូតគាមអនាម័យ (ការនាំចេញក្រៅផ្លូវការ) តាមច្រករបៀងទៅកាន់ប្រទេសវៀតណាមនិងប្រទេសថៃ មួយចំនួនទៀតមិនមានការកត់ត្រា»។
បើតាមលោក អួន ស៊ីឡុត ប្រធានសមាគមស្វាយចន្ទីកម្ពុជា (សសក) បានប្រាប់ឱ្យដឹងនៅថ្ងៃទី៩ ខែកក្កដាថា កត្តាដែលធ្វើឱ្យមានការធ្លាក់ចុះ ដោយសារកសិករកាប់ស្វាយចន្ទីចោលអស់ប្រមាណ ១០ម៉ឺនហិកតា ក្នុងរយៈពេល២ឆ្នាំចុងក្រោយនេះ។
លោកបន្ថែមថា បច្ចុប្បន្នភាពផ្ទៃដីក្រៅផ្លូវការ ប្រមូលដោយ សសក សរុបផ្ទៃដីដាំដុះស្វាយចន្ទីទូទាំងប្រទេសមានចំនួន ៤៩៣ ០៨៧ ហិកតា ប៉ុន្តែ សសក ប៉ាន់ប្រមាណថា មានចំនួនរហូតដល់ ៧០០ ០០០ហិកតា។ ដោយឡែកផ្ទៃដីស្វាយចន្ទីក្រៅតំបន់ សមាគមស្វាយចន្ទីកម្ពុជា ដែលថតដោយក្រុមហ៊ុន AGRITEKK TECHNOLOGIES មានចំនួន១៣០ ៣៨៣ហិកតា។
លោក អួន ស៊ីឡុត បានបញ្ជាក់ទៀតថា៖ «ម្យ៉ាងវិញទៀត កសិករមានធនធានហាលគ្រាប់ទុកលក់នៅពេលគ្រាប់ឆៅឡើងថ្លៃចន្លោះពីខែសីហា និងខែតុលា ទើបគាត់សម្រេចចិត្តលក់ ខណៈដែលកសិករខ្លះទៀត មានតម្រូវការលក់ភ្លាមៗ ព្រោះត្រូវការទូទាត់ជាមួយខាងធនាគារ ឬគ្រឹះស្ថានហិរញ្ញវត្ថុជាដើម»។
លោកបន្ថែមថា ក្នុងឆ្នាំ២០២២កន្លងទៅ ទំហំទឹកប្រាក់ដែលបានចាក់បញ្ចូលទៅក្នុងសេដ្ឋកិច្ចជាតិ តាមរយៈការនាំចេញផលិតផលស្វាយចន្ទី មានប្រមាណ១ ០៧៧លានដុល្លារ ដែលជាចំនួនដ៏ច្រើនមួយ បន្ទាប់ពីស្រូវអង្ករ ដែលនេះ បង្ហាញថា ការអភិវឌ្ឍវិស័យស្វាយចន្ទី ពិតជាមានសារៈសំខាន់ណាស់ សម្រាប់កំណើនសេដ្ឋកិច្ចជាតិ។
លោកប្រាប់ថា៖ «ដូច្នេះហើយ ទើបសសក បានខិតខំស្វះស្វែងរកកិច្ចសហការ ពីដៃគូពាក់ព័ន្ធនានា ជាពិសេសផ្នែកហិរញ្ញប្បទាន ដើម្បីជំរុញការនាំចេញស្វាយចន្ទីនេះ។ កាលពីខែមិថុនា ឆ្នាំ២០២៣ យើងបានសហការជាមួយធនាគារ SME ដើម្បីជំរុញលទ្ធភាពទទួលបានហិរញ្ញប្បទានសម្រាប់សហគ្រាសធុនតូច និងមធ្យម ដែលជាសមាជិកនៃសមាគមស្វាយចន្ទីកម្ពុជា ក្នុងការទទួលបានអត្រាការប្រាក់ទាបជាងមុន»។
លោក អួន ស៊ីឡុត បានបន្ថែមថា កិច្ចសហប្រតិបតិ្តការនេះ ជាគោលដៅយុទ្ធសាស្រ្តដែលធនាគារបានកំណត់ ដើម្បីគាំទ្រដល់ការរីកចម្រើននៃវិស័យស្វាយចន្ទីនៅក្នុងប្រទេសកម្ពុជា។
លោកបញ្ជាក់ថា៖ «យើងជឿជាក់យ៉ាងមុតមាំថា ការចុះអនុស្សរណៈនៃការយោគយល់គ្នានេះ គឺជាផ្នែកមួយក្នុងការដោះស្រាយបញ្ហាប្រឈមក្នុងខ្សែចង្វាក់ផលិតកម្មស្វាយចន្ទី ក៏ដូចជាជួយលើកកម្ពស់វិស័យឧស្សាហកម្មកែច្នៃស្វាយចន្ទីនៅកម្ពុជា ឱ្យកាន់តែប្រសើរឡើងថែមមួយកម្រិតទៀត»។
បើតាមលោក អួន ស៊ីឡុត ប្រសិនបើរាជរដ្ឋាភិបាលចង់ជំរុញឱ្យវិស័យស្វាយចន្ទីដើរបានកាន់តែលឿន រាជរដ្ឋាភិបាលត្រូវលើកទឹកចិត្តវិនិយោគិនក្នុងស្រុក ដែលមានទុនច្រើន ធ្វើការវិនិយោគលើការកែច្នៃដើម្បីនាំចេញ ជាជាងរង់ចាំវិនិយោគិនបរទេស។
លោក អួន ស៊ីឡុត បានថ្លែងទៀតថា ចំពោះគោលនយោបាយស្វាយចន្ទីវិញ បច្ចុប្បន្ននេះ កំពុងតែមានការអនុវត្តយ៉ាងសស្រោកសស្រាំហើយ តាមរយៈធនាគាររដ្ឋចំនួន២ គឺធនាគារអភិវឌ្ឍន៍ជនបទ និងកសិកម្ម និងធនាគារអភិវឌ្ឍន៍សហគ្រាសធុនតូច និងមធ្យម ដោយធនាគារទាំង២នេះ បានជួយដល់សហគ្រាសធុនតូច និងមធ្យម ខណៈដែលសមាគមមានសមាជិកចំនួន២៧សហគ្រាសតូចៗ ។
លោកថា ៖ «យើងកំពុងតែអនុវត្តគោលនយោបាយនេះជាមួយក្រសួងកសិកម្ម ដោយយើងសង្កេតឃើញថា ក្រសួងបានខិតខំប្រឹងប្រែងខ្នះខ្នែងណាស់លើការងារនេះ សម្រាប់ជួយជ្រោមជ្រែងឱ្យគោលនយោបាយនេះដើរទៅមុខ។ ក្រសួងបានជួយសម្របសម្រួលសព្វបែបយ៉ាងលើការងារនេះ បើគ្មានក្រសួងទេ យើងក៏ពិបាកធ្វើការងារនេះដែរ»៕
