(ភ្នំពេញ)៖ ក្នុងរយៈពេល៩ខែឆ្នាំ២០២៣នេះ កម្ពុជាទទួលបានគម្រោងវិនិយោគក្នុងវិស័យឧស្សាហកម្មចំនួន ១៧៥ ក្នុងទុនវិនិយោគ ១ ៨០០លានដុល្លារ កើនឡើង ៤៣គម្រោង បើធៀបនឹងកាលពីឆ្នាំ២០២២។
ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា រយៈពេល៩ខែ ឆ្នាំ២០២៣នេះ ខ្លួនបានអនុម័តឱ្យក្រុមហ៊ុនវិនិយោគលើគម្រោងថ្មីចំនួន ១៩១គម្រោង ក្នុងទុនវិនិយោគ ៣.៧ពាន់លានរៀល ក្នុងនោះគម្រោងវិនិយោគក្នុងវិស័យឧស្សាហកម្មមានចំនួន ១៧៥គម្រោង ទុនវិនិយោគ ១.៨ ពាន់លានដុល្លារ កើនឡើង៤៣គម្រោង បើធៀបនឹងកាលពីឆ្នាំ២០២២ ដែលមាន១៣២គម្រោង។
គម្រោងធំដែលគួរឱ្យកត់សម្គាល់ គឺគម្រោងបង្កើតរោងចក្រផលិតដែក គ្រប់ប្រភេទរបស់ក្រុមហ៊ុន HUALE STELL ដែលមានទីតាំងវិនិយោគស្ថិត ក្នុងតំបន់សេដ្ឋកិច្ចពិសេសកំពង់ផែក្រុងព្រះសីហនុ ក្នុងទុនវិនិយោគចំនួន៤០លានដុល្លារ និងអាចបង្កើតការងារបាន ៥២៣កន្លែង។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានអោយដឹងថា នេះជាសញ្ញាល្អមួយ ដែលកម្ពុជាទទួលបានគម្រោងវិនិយោគ ក្នុងវិស័យឧស្សាហកម្មកើនឡើង ក្នុងពេលដែលសេដ្ឋកិច្ចសកលមិនទាន់មានភាពល្អប្រសើរ ដែលបង្ហាញពីភាពទាក់ទាញរបស់កម្ពុជា ចំពោះវិនិយោគិនបរទេស និងការទាក់ទាញវិនិយោគិនរបស់ថ្នាក់ដឹកនាំក្នុងអាណត្តិនេះ។
លោកសង្កេតឃើញថា គម្រោងវិនិយោគមួយចំនួន គឺផ្នែកកម្មន្តសាល មិនមែនកាត់ដេរ ដូចជារោងចក្រដំឡើងរថយន្ត រោងចក្រអេឡិចត្រូនិច រោងចក្រផលិតសំបកកង់រថយន្ត ផលិតកង់ និងគ្រឿងបង្គុំផ្សេងៗជាដើម។ គម្រោងវិនិយោគកម្មន្តសាលមិនមែនកាត់ដេរ គឺជាការវិនិយោគដែលជួយដល់ការទ្រទ្រង់សេដ្ឋកិច្ចកម្ពុជា ឱ្យមានភាពរឹងមាំ មាននិរន្តភាព។
មួយគ្នានេះ ការវិនិយោគទៅលើឧស្សាហកម្មរ៉ែ និងកសិ-ឧស្សាហកម្ម ក៏មានការកើនឡើងគួរឱ្យកត់សម្គាល់ផងដែរ។
លោកបន្ថែមថា តាមរយៈដំណើរទស្សនកិច្ច របស់សម្តេចមហាបវរធិបតី ហ៊ុន ម៉ាណែត ទៅក្រៅប្រទេសផ្សេងៗ ដែលបានជួបជាមួយបណ្តាវិនិយោគិនផ្សេងៗ នឹងអាចទាក់ទាញទុនវិនិយោគពីក្រៅប្រទេសបន្ថែម។
យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា ពីខែមករា ដល់ខែសីហា ឆ្នាំ២០២៣នេះ កម្ពុជាបាននាំចេញម៉ាស៊ីន និងគ្រឿងបង្គុំផ្សេងៗ ក្នុងទំហំទឹកប្រាក់ ២.១ពាន់លានដុល្លារ កើនឡើង៩៨.៥% បើធៀបនឹងរយៈពេលដូចគ្នាកាលពីឆ្នាំ២០២២៕
