ទន្ទឹមនឹងនេះលោកក៏បានឱ្យមន្ត្រីពន្ធដារត្រូវបន្តផ្សព្វផ្សាយនិងពង្រឹងការអនុវត្តវិធានវិក្កយបត្រក្នុងចំណោមអ្នកជាប់ពន្ធនិងកម្មវិធីវិក្កយបត្រនាំសំណាងឱ្យមានការចូលរួមបន្ថែមទៀតពីសាធារណជន ដើម្បីធានាបានប្រសិទ្ធភាព និងតម្លាភាពក្នុងការគ្រប់គ្រងប្រមូលចំណូលពន្ធ។
លោក គង់ វិបុល បានថ្លែងថា៖ «ត្រូវបន្តអនុវត្តវិធានការចាំបាច់នានាដូចមានកំណត់ក្នុងសារាចរណែនាំស្តីពីការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ និងបន្តអនុវត្តដោយយកចិត្តទុកដាក់នូវយុទ្ធសាស្ត្រកៀរគរចំណូល ២០១៩-២០២៣»។
សូមបញ្ជាក់ដែរថា ចំពោះលទ្ធផលនៃការគ្រប់គ្រងប្រមូលពន្ធសម្រាប់ខែមេសាឆ្នាំ ២០២៣ ចំណូលពន្ធអាករគ្រប់ប្រភេទដែលអគ្គនាយកដ្ឋានពន្ធដារ ប្រមូលបានមានចំនួន ៩៨៤,៥៩ ប៊ីលានរៀល ឬស្មើប្រមាណជា ២៤៣,១១ លានដុល្លារស្មើនឹង ៦,៨១ ភាគរយនៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាលោក ហុង វណ្ណៈ បានលើកឡើងថា ដំណើរការនៃការវិវឌ្ឍសេដ្ឋកិច្ចសង្គមរបស់ប្រទេសកម្ពុជាបាននិងកំពុងឈានឆ្ពោះទៅរកសភាពធម្មតាឡើងវិញជាបណ្តើរៗដែលធ្វើឱ្យប្រជាជនអាចប្រកបរបរឬក៏អាចរកប្រាក់ចំណូលបានជាប្រក្រតីដែលអាចឱ្យពួកគាត់មានលទ្ធភាពបង់ពន្ធចូលថវិការដ្ឋបានទៅតាមការកំណត់របស់ពន្ធដារ។
លោកបានបញ្ជាក់ប្រាប់ថា៖ «ស្ថិរភាពនៃដំណើរនៃការអភិវឌ្ឍ ឬការកសាងសន្តិភាពនៅកម្ពុជាដែលធ្វើឱ្យវិនិយោគិន និងប្រជាពលរដ្ឋមានសេរីភាព ពេលវេលា និងឱកាសក្នុងការប្រកបរបររកទទួលទាន ដោយមិនមានការប៉ះពាល់ស្មារតី ឬការរកចំណូលរបស់ពួកគាត់ឡើយ»។
សម្រាប់ការប្រមូលសារពើពន្ធ និងពន្ធគយនៅក្នុងឆ្នាំ ២០២៣ នេះ លោក ហុង វណ្ណៈ ក៏បានលើកឡើងផងដែរថា ដោយសារតែសញ្ញាណនៅក្នុងឆ្នាំ ២០២២ មានសម្ទុះខ្លាំង ហេតុដូច្នេះឥទ្ធិពលទាំងនេះនឹងកាន់តែបង្ហាញពីភាពស្ទុះ ១ កម្រិតថែមទៀតនៃការប្រមូលពន្ធរបស់ប្រទេសកម្ពុជាដែលនឹងមានកំណើន ហើយពន្ធនៃការនាំចេញ និងនាំចូលវិញក៏មានកំណើនផងដែរនៅក្នុងឆ្នាំ ២០២៣ នេះ៕
