ភ្នំពេញៈ ពាណិជ្ជកម្មទ្វេភាគីកម្ពុជា-បារាំង ក្នុងរយៈពេល ៥ ខែដើមឆ្នាំ ២០២៣ សម្រេចបានជាង ២១០ លានដុល្លារ ធ្លាក់ចុះ ៦ ភាគរយ បើធៀបរយៈពេលដូចគ្នាឆ្នាំ ២០២២ ក្នុងនោះទំនិញដែលកម្ពុជានាំចេញទៅបារាំង មានទឹកប្រាក់ជាង ១៥៦ លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា (GDCE)។
យោងតាម GDCE ការនាំចេញ-នាំចូលទំនិញរវាងកម្ពុជា-បារាំង ពីខែមករា-ខែឧសភា ឆ្នាំ២០២៣ មានទឹកប្រាក់សរុប ២១០,៦៤លានដុល្លារ ធ្លាក់ចុះ ៦ភាគរយធៀបនឹងរយៈពេលដូចគ្នាឆ្នាំ២០២២ ក្នុងនោះទំនិញកម្ពុជានាំទៅបារាំង ១៥៦,៥៨លានដុល្លារ ថយចុះ ៨,៤ភាគរយ និងទំនិញបារាំងមកកម្ពុជា ៥៤,០៦លានដុល្លារ កើនឡើង ១,៥ភាគរយ។ តាមរយៈនេះ គឺជញ្ជីងពាណិជ្ជកម្មកម្ពុជាមានឧត្តមភាព ១០២,៥២លានដុល្លារ
ដោយឡែកសម្រាប់ខែឧសភា ទំហំពាណិជ្ជកម្មរវាងប្រទេសទាំង ២ គឺមានទឹកប្រាក់សរុប ៤១,៩៨លានដុល្លារ ធ្លាក់ចុះ ១១,៥៤ភាគរយ ដោយការនាំចេញរបស់កម្ពុជា មានចំនួន ៣១,១៣លានដុល្លារ ធ្លាក់ចុះ ១៦,៨ភាគរយ និងទំនិញបារាំងនាំមកកម្ពុជា មានចំនួន ១០,៨៥លានដុល្លារ កើនឡើង ៨ភាគរយ។
អនុប្រធានសភាពាណិជ្ជកម្មកម្ពុជា លោក លឹម ហេង ធ្លាប់និយាយថា បារាំង គឺជាទីផ្សារទទួលទិញទំនិញសំខាន់មួយរបស់កម្ពុជា ហើយបច្ចុប្បន្នក៏មានវិនិយោគិនបារាំងមួយកំពុងបណ្តាក់ទុននៅកម្ពុជាផងដែរ។
លោកបន្តថា ប្រទេសទាំង ២ មានទំនាក់ទំនងនយោបាយ និងការទូតជាមួយគ្នាជិត ២ទសវត្សមកហើយ។ ដោយសារប្រទេសបារាំងស្ថិតក្នុងសហគមន៍អ៊ឺរ៉ុបដែលផ្តល់ប្រព័ន្ធអនុគ្រោះពន្ធ EBA ឱ្យកម្ពុជា ដូច្នេះទំនិញកម្ពុជាមួយចំនួនទៅបារាំង គឺមិនតម្រូវឱ្យបង់ពន្ធឡើយ។
លោកបន្តថា៖«នៅពេលស្ថានភាពជម្លោះ និងវិបត្តិសកលនានាដែលកំពុងកើតក្នុងពេលនេះបញ្ចប់ទៅវិញ សេដ្ឋកិច្ចពិភពលោកនឹងមានកំណើន ដូច្នេះការបញ្ជាទិញពីកម្ពុជានឹងកើនឡើងវិញ»។
បើតាមលោក លឹម ហេង ផលិតផលកម្ពុជានាំទៅបារាំង ភាគច្រើនជាសម្លៀកបំពាក់ ស្បែកជើង កាបូបធ្វើដំណើរ និងផលិតផលកសិកម្ម ចំណែកទំនិញបារាំងនាំមកកម្ពុជា មានដូចជា រថយន្ត ឧបករណ៍អគ្គិសនី-អេឡិចត្រូនិក សម្ភារសំណង់ និងគ្រឿងសង្ហារឹម ជាដើម។
ក្នុងឆ្នាំ២០២២ ការធ្វើពាណិជ្ជកម្មទ្វេភាគីកម្ពុជា-បារាំង មានទឹកប្រាក់សរុប ៥៤២,៣៧លានដុល្លារ កើនឡើង ២៥,៩ភាគរយធៀបឆ្នាំ២០២១ ដែលមានចំនួន ៤៣០,៧១លានដុល្លារ។ ក្នុងនោះកម្ពុជានាំចេញទំនិញទៅបារាំង ៤២៣,១៣លានដុល្លារ កើនឡើង ២៧,៩ភាគរយ ចំណែកទំនិញបារាំងនាំមកកម្ពុជា មានចំនួន ១១៩,៨៨លានដុល្លារ កើនឡើង ១៩,៤ភាគរយ៕
